Cod. 8954 - 102r-102v

Aus Wien vom 8ten Aprill anno 1581
   1] Der könig von Poln ist nunmehr von Warsow abgeraistt, der mainung, den krieg wider den moscoviter zu prosequiren, darzu er albereit inn Sibenbürgen unnd sonst anderer ortten, wie er inn Oberhungern auch gern wollte, aber es wierdet ime nit gestatt, kriegsvolckh anzunemmen unnd allenthalben fürberaitung zumachen, solle  es aber noch zu einem friden khummen, wie man von einer stattlichen potschafft segt, so wierdet es ungezweifelt mit deß moscovitters merckhlichen unstatten geschehen müessen, alhir ist sunst inn der gemain die sag, die Bap(s)t(liche) Hey(ligkei)t habe gewilligt, sich inn die sachen zuschlahen, wofern der moscovitter seine ceremony ändern unnd sich mit der römischen kirchen vergleichen wolle, aber das ist zweifenlich.
   2] Inn Hungern sein die feind uberall still, allein seien sy inn Oberhungern bey Zolnockh beieinander gewesen, wie sie aber der unsern gegensamblung gesehen, sein sy wider von einander gezogen unnd mag villeicht woll sein, das diese ir versamblung zu irer defension angesehen worden, sy wurden sich sunsten an ein straiff nit leicht von einander geben haben.
   3] Der bassa ist wider von der raiß zu Ofen ankhummen, seiner raiß ursach soll die zalung gewest sein, ist also das geschray wider Wywar wider erloschen. Diese tag hat sich ein dumult zu Ofen durch ein judin angewiflt, solle so ein grosse menig juden, türggen unnd christten mit solcher ungestumb für den bassa khummen sein, das er vermaint hat außzureissen, endtlich ist das getümmel khaum gestillt worden, der bassa aber hat solches alßbald  an die portten geschriben unnd protestiert, da nit einsehens beschehe, so müeste er sich von disem ambt begeben.
   4] Das vill ansehenlicher türggen von der hungern gränitz hinein wider den persianer gefüert werden, das ist noch war.
   5] Vor wenig tagen sein dreizehen gefangne christen zu Wolzna dem türggischen dreißiger daselbst durch mitl, das ime durch die unsern von der gränitzen etliche instrument zugeschlaipft worden außkhummen.