Cod. 8954 - 158r-159r

Aus Prag von 22. Juny
   1] Die verschine tag ist die F(ürst)l(iche) Durch(lauch)t ertzherzog Carol widerumb zue rugg vonn Dresen durch Böhem nach Wien verrayset, ist 3 meill nachendt allhie, aber nit volentz herein khommen, was Irer Durch(lauch)t verrichtung würdet manicherlay gerödt, daz aber sagt man austruckhenlich, daz der churfürst vonn Sachsen auf sein schuldforderung unnd pfandtschilling Oberlausnitz dringen will, khombt die schuld vom verstorbnen hochloblister seligen gedächtnuß kayser Maximiliano, auch vonn dieser Kay(serlichen) Ma(jestä)t her, die summa sechsmall hundert tausendt guldin.
Die Kay(serliche) Ma(jestä)t etc. habe ettliche stattliche erbgüetter (so pfantschillings weis versätzt) gar käflichen fahren laßen, daz mag dem churfürsten ursach geben, daz er nach Lausnitz trachten wirt.
   2] Nächst verschine wochen hat sich herzog Hainrich von der Lignitz inn Schlesien unnutz gemacht, demnach er ungefahr zue anfang dises jars widerumb durch die Kay(serliche) Ma(jestä)t etc. inns landt eingesätzt, hat er dem bischoff von der Neyß  (alls obristen presidenten über gantz Schlesien) anstatt der Kay(serlichen) Ma(jestä)t etc. sollen schwören, welliches er mit nichten thuen wellen unnd noch nit ist auch mit seinem bruederen herzog Fridrichen der erbthaillung noch nit verglichen, die Kay(serliche) Ma(jestä)t etc. mandiert mit 5 oder 6 befehlhen nachainander, ine allher zu khommen, welliches er auch nit thuet, nit waißt man aigentlich, was er mit dem khönig inn Polln für practikhen hat, macht sich auf unnd wollte mit ettlichen pferden nach Polln wischen, der bischoff von der Neyß unnd Preßla bekhommens inn erfahrung, seindt eillents bey tag und nacht mit ettlich tausendt mann hinder ime her, belägeren ine inn seiner statt Lignitz, er laßt daz geschütz auf die pasteyen fiehren und ställt sich zuer wöhr, ettliche sagen, er habe sich bey verliehrung seiner fürstlichen ehren auch lanndt unnd leüt zuem höchsten versprochen, sich inner 14 tagen allher aigner person for der Kay(serlichen) Ma(jestä)t etc. zuestellen unnd wie man sagt, soll darauf daz kriegsvolckh for Lignitz abgezogen sein.
   3] Verschinen sontag hat der kayserin hofmaister herr Proßkhofsky iren trabanten unnd anderm hofgesindt austruckhenlich angesagt, sie sollen sich allerdings zuem aufbruch unnd von hinnen ziechen förtig machen, daz soll auf 8. oder 10. July gewis geschechen, die Kay(serliche) Ma(jestä)t etc. geben 25 trabanten mit biß gehn Genova, der weg zue dieser rheis soll vonn hinnen nach Wien, Kärnten unnd Italia genommen werden.