Cod. 8954 - 191r-192r

Aus Wien von 16. July
   1] Der obrist von Erla hatt erfahren, daz die türggen bey Zolnockh zuesamen ziechen unnd bey Hutzesy ein castell bauen wollen, darauf er 50 pferdt ausgeschickht, die ain grundt erkhundigen und ain zungen bekhommen mechte, dieweill auch diese gar auf Berin und für Hattwan durchziechen mießen, hatt er 200 pferdt hinnach geschickht, auf welliche die andern (da sye gejagt wurden) fliehen khönten, nachdem  nhun die türggen irer gewahr worden, seind die vonn Borin und Hattwan fast alle zuegezogen, derhalben die unnsern auf ir hinderhaltt getrungen, dahin die türggen mit nachsetzung auch gelangt, also ain starckhen scharmitzell gehabt, doch die türggen letstlich die flucht geben und derselben 26 lebendig gefangen, ettliche köpff und ross gegen Erla gebracht worden.
   2] Baldt hernacher haben die granerische türggen denen von Raab starckhe hallt inn St. Johans waldt gesteckht, bey 20 pferdt nachendt der vöstin rennen laßen, welliche ainen vonn den halt reittern, auch ettliche personen, so genäet unnd bey dem viech gewesen, mit sampt dem viech hinweg gefiert, der obrist hatt nit vil pferdt bey sich gehabt, dann ainesthaills noch im graas, die andern auch nit gestapffert seindt der langsamen bezalung halben, derhalben er den türggen so eillents nit nachjagen hatt khönden, und allain mit dem fuesvolckh ain weeg hinach gezogen.
   3] Den 10ten dis haben die türggen von Graan und Nograd (darbey baide dieselben beegen gewesen, man auch des baßa von Ofen dahin erwartet hatt) bey Damos ann der straßen vonn Graan auf Waetzen ain castell gemacht, sonderlich derowegen, damit dieselb straßen von der unsern straiffen mechte versichert werden, dann die commorischen offt dahin zuem valdt zakho zuekhommen, da dis orth gleich darvor und 1 meill von Graan, 2 von Nograd, 4 von Lewa und 4 von Viwar ligt, sye haben andere vil nähere heüser bey uns, derhalben abzuenemmen, daz sye daz jetzige uns nit zue schaden, sondern daz irige zueversichern gepauet haben.