Cod. 8954 - 231r-231v

Aus Wien vom 16. Augusti anno 81
   1] Den ersten ditz monats ist der Khay(serlichen) M(ajestä)t etc. gewester orator zu Constantinopl Joathin von Sintzendorff alhie ankhumen, ist dieser zeyt noch alhie, aber er wirdet in khurzen von hinen nach Prag abraysen, mit ime ist ein türggische potschafft, von dem sulthan selbs an die Khay(serliche) M(ajestä)t abgeferttigt, zu Ofen ankhumen und vast den halben weg auf der rayß mit ime heraus gezogen, diese botschafft wirdet strachs von Commorn aus nach Prag und dan von dannen hieher belaittet worden, ir werbung ist furnämblich, das er bevelch hat, Ir Khay(serliche) M(ajestä)t von des sulthans wegen auf die beschneidung seines ersten suns zuberueffen, wie dann anndern potentaten mer auch berueffen sein sollen, von annderer werbung hören wir nit one was er bey der F(ü)r(stlichen) D(u)r(chlaucht) ertzhertzogen Ernnsten anzubringen haben mechte, der bassa zu Ofen hat gedachten den von Sintzendorff dermaßen so wol tractiert, das er darvon nit gnuegsam werden khan, von dieser ungwonlichen ladung wirdet hin und wider vil geredt, die sich der sachen versteen meinen für gwis, es sey auf ein khundschafft angesehen, derweil von der Khay(serlichen) M(ajestä)t etc. absterben hin und wider durch alle lanndt so ein grosses geschray einganngen ist.
   2] Der polnische frid mit dem moscowitter soll yetzo an dem stehen, das ime der moscowitter nur ein vesten im Liflanndt vorbehalten, welches aber der khünig in Pollen nit annemen wöllen und derowegen im forttziehen wider den moscowitter sein soll.
   3] Zu Canischa ist ein gefharlich pratickhen mit den türggen von einer namhafften person im werckh gewest, dardurch auch die vesten gar verloren werden mügen. Davon solle mit negsten merers geschriben werden.
   4] Sunst ist es an den gränizen hin und wider zimblich still. Der römischen khayserin gewartten wir sambt ertzhertzog Ernnsten und der künigen auß Franckhreich bis mittwoch khünfftig hieher.