Cod. 8954 - 354r-355r

Aus Wien vom 28. December anno 81
   1] Am negst verschinen sambstag den 23ten ditz ist die Khay(serliche) M(ajestä)t umb vier uhr nach mittag frisch unnd gesundt alhie ankhumen, gleich wol sein Ir M(ajestä)t nit durch die statt, sundern beim burgthor und volgundts also in die burg eingezogen, in der burg sein die vom rath der statt Wienn gesanndten, sich bey Irer M(ajestä)t zuerzaigen, denen sämbtlich Ir M(ajestä)t die henndt gepotten, und sein Ir M(ajestä)t nun in berayttung, sich mit negstem auff dem hungern lanndtag geen Presburg zubegeben.
   2] Die türggen haben dise täg etliche straiff und einfall umb Canischa herumb gethon, doch des besen wetters halben nichts sunders außrichten khünden, allein das sy etliche wenig person und viech hinweg getriben haben.
   3] Zu Vywar, da dis jar herumb ein neue vesten erhebt worden, ist vor wenig tagen auff der türggen hefftig begern ein copy prechen und khumpff zwischen etlichen den unnsern und mit den türggen angestelltt worden, aber Ir D(u)r(chlaucht) haben denselben auß bedennckhlichen ursachen wider abgeschafft, helltten aber darfür, er werde noch ein weg als den anndern forttgeen.
   4] Mit des khünigs von Poln niderlag ists etwas stiller, also das es sich laßt ansehen, als wolltte mit dem jungstem geschray diser niderlag halben nit vil daran sein, wie man dann schreiben vom 23ten verschines October auß dem polnischen lager hat, darinnen dergleichen nichts gemeldet wirdet.
   5] Von Constantinopel haben wir, das der Sinan obrister vezier bassa etwas in ungnad bey dem groß türckhen sein soll, aus ursachen, das er der persianischen botschafft halb, so des fridens halb dahin khumen sollen, für und für vertröstung gethon, dieselben doch nit khumen wollen, ist mündtlich er, der Sinan, verursacht worden, ein aignen currier hinein in Persian zu ferttigen, der hat sovil bracht, das dise botschafft erst zu dem fest des türggischen khaysers suns beschneidung heraus khumen werde, hie zwischen richte man gezolltt zur verehrung zue, last sich also ansehen, weil die türggen selbs nach disem frid so starckh trachten, es mechte ein mal zu einem frid khumen.
   6] Sunsten auf den hungerischen gränizen ists gar still und rhueig und erpeutt sich der bassa seines thails aller gueter nachtparschafft, man soll nur auf diser seitten nichts widerwerttigs anfahen.