Cod. 8955 - 383r-383v

Auß Wien vom 12. Augusti 82
   1] Der neu beg von Weißenburg hat jungstlich auf daz dorff Warsan gestraifft und daselbst etliche gehuldigte paurn aufhaben lassen, darzue sein etliche diennstleüt von Gesneckh im hauß, nit weit von Papa gelegen, zu fueß khomen, die haben die underthonen retten wellen, auf solches sein die türggen auß iren hallten außgesprengt und die unsern dermaßen umbringt und geschlagen, daz nit mer alls ain ainicher dienstman darvon khomen, die anndern alle sambt den underthonen sein aintweder gefanngen oder nider gehaut worden, also das irer nahent bei hundert gebliben sein, dem bassa hat man gleichwol umb restitution der dienstleüt geschriben, aber es ist woll zuerachten, es werde niemandt seinem gebrauch nach zuruckh geben.
   2] Der bassa von Ofen hat ain zeit herumb ain grenitzberaittung für sich gehabt, allß er in dieser verrichtung herumb gezogen, sein zu Ofen zwen khapitschy bassa, so von Constantinopl abgeferttigt worden, ankhumen, die sollen bevelch haben, der jungsten niderlag halben inquisition zuhallten, darauf ist der bassa eilents wider zu ruckh auf Ofen zogen, und wie man vernimbt und es etliche gefanngen türggen bekhenen, sein die zwen beg von Zalmackh und Hatwan alberait nach Constantinopl fortgeschickht und steet an dem, daz der bassa auch bald hinnach sol.
   3] Jungster brief von Constantinopl, so noch im Junio ausganngen, confirmiren, allß der persianische gesante in schlieslicher tractation mit den türggen des fridts halber gestannden, seyen zeittungen khomen, daz die türggen abermaln ain sehr bluetige niderlag vom persianer erlitten, also daz vil tausent türggen unnd darundter allain siben begler beegen bliben sein sollen, darauf hab man dem gesandten nit allain sein unnderhalltung abggestrickht, sonnder ine auch gefenglich (solle die gefenckhnuß zum siben thiernen sein) angenommen, unnd sey sich allso khaines fridts, sonder nur mehrer wietterung zuversehen.