Cod. 8956 - 191r-191v

Aus Wien von 30. Augusti
   1] Die F(ürst)l(iche) D(urchlaucht) ertzherzog Maximilian seindt auß  Steyer widerumb khomen, die solicitiert nun selbst wegen Irer Durch(lauch)t raiß in Obernhungern, dan die Khay(serliche) Ma(jestä)t haben derowegen ertzherzogen Ernst widerkhunfft aus Bayern hievor erwartet.
   2] Zue Canischa ist ain brunst vor ettlichen tagen gewest, die hat die 2/3 in aussern fleckhen hinweckh genomen, doch so ist so großer schad nit geschehen alls vor ainem jar.
   3] Bey Palatha haben die thurggen vor Weyssenburg die unsern zum kampf gefordert, von den thurggen seindt 4 tödlich gerent, der unsern 2 verwundt.
   4] Die thurggen haben ettliche täg herumb außgeben, die persianer weren von inen hart geschlagen worden, darumb sy auch freudenfeyr und schuß zue Ofen, Pest und andern ortten gethon, es findet sich aber, daz solliche freudenzaichen allain geschehen wegen der hinabgebrachten present, und ist her Paulus von Eytzing gar ehrlich allenthalben bey den thurggen entpfangen, gehalten und fortgefuert worden.
   5] Die sackhmayrische handlung mit dem khunig von Pollen ist noch beschlossen und steet darauf, daz die Khay(serliche) Ma(jestä)t dem khunig von Pollen daz reiche berckhwerckh Nagbania, daz sy hayssen Rivuli Dominorum, letstlich werden einraumen sollen, darvon herr Felicius freyherr zue Herberstayn jherlich 9000 thaller bestand gibt.
   6] Graf Bernhardt von Hardeckh wurdt widerumb gefordert, mit ime zueschliessen wegen des obristen befelchs zue Wywar.
   7] Also wurdt auch mit dem herren Christofen Ungenaden gehandlet wegen annemung des obristen befelchs zue Erla.
   8] Herr Kuelman wurdt nun in kurtz seinen dienst andretten alls kriegsracht und obrister zeugmaister.
Also ist nunb auch in berathschlagung, wer an sein stell dahin zuenenen, der gemain ruef geet auf den herren Niclaus Palfi, weill er spann in der spanschafft Presspurg in derselben insell mit den inwohnern zue gebuetten, werde er mit guettem nutz auch den befelch zue Comoren regieren khönen.
   9] Die österreichische zahlung wurdt auch diese wochen auf Raab und ire angehorige ort und grenitzen folgeen.
   10] Der Khay(serlichen) Ma(jestä)t aufbruch gehen Prag soll noch den 10. September beschehen, wie dem  hofgesindt publiciert ist worden.