Cod. 8958 - 426r-426v

Auß Prag von 27. September
   1] Derweil der babst dem neu erwöhlten bischof und churfürsten zue Cölln den hiezuvor bewilligten deciman revociert, so hat die bayde churfürssten Mayntz und Tryer fuer guet angesehen, das alle die reychs ständt ime dem neuen bischoff bewilligen sollten, volgen zue laßen, die auf jungst gehaltnem reychstag zue Augspurg verglichne unnd bewilligte kriegshülf zwayer monaten zue beschutzung des westphalischen krays, damit auch bayde churfürssten Mayntz unnd Trier die andere reychs stände hiezue desto lüschtiger möchten machen, haben sye ihres thayls alberayht schon verhayßung gethan oder doch zum wenigsten sich also erzaigt, iren gebüerenten anthayll (inn die 80m thaller belauffende) daher zue fornieren, dieweil aber gedachte 2 monat hilff damaln angesehen  und gemaindt seindt worden zue verhueten (auf den fall) deß Duca de Alonzons francösisches kriegsvolckh vom reichsboden in irem pasieren abzuehalten, ist mißlich, ob die reychs stände solliche hielf zue obgemelter deß neuen cölnischen bischoffs intention zue gebrauchen ir bewilligung geben werden, soviel auch der Kay(serlichen) May(estä)t etc. hofrathe thuet belangen, spüre ich soviell, daz sye sich deßen schon hart beschwären, also auch nit weniger den graven von Neuemart oder Moers (auf anhalten höchstgedachter churfürssten) inn die aecht zue erclären.
   2] Ir Kay(serliche) May(estät) etc. hat sich vonn Brandteys noch waz weitter hindan und gehn Bylsen gethan wegen aines cammer jungen, der mit infection der peste ist angriefen worden.
   3] Die stadt Colin, 6 meill von hinnen, ist zuer residentia der fürstlichen ampassatorn unnd agenten deputiert worden, weill aber dasselb ohrt der infection halben nit viel sicherer als alhie wegen des freyen paß weiß ich nit, ob wir uns dahin begeben werden.
   4] Bey der execution der vergleichung zwischen der Kay(serlichen) May(estät) etc. und dem Batory, welliche dann durch derselben comissarien fast allerdings beschloßen gewest, erzaigt sich ain neuer streit allain ob der auslägung oder verstandt etlicher wortt, welliches daz werckh an der volziehung woll noch was möchte verhindern oder auf ziehen, sonderlich weil man besorgt, der Battory werde sich balt widerumb vom selbigen ohrt hinweg begeben.