Cod. 8959 - 671r-671v

1] Kurtze verzaichnus, was die stendt im Königreich Böheim auf die 5 articul im vertrag auf dem landtag bewilligt haben.
Erstlich die 30.000 taler haben sy Ir Khay(serlichen) May(estä)t etc. geschenckht.
Das bergkhwerckh haben sy Ir May(estä)t haimbgesteldt, das er selbst guetter wirdt sei unnd mit seinen cammerräthen unnd dienern fleissig zuesehen, damit nit untreulich gehandelt würdt.
Was das floßen und schiffreich wasser, die Elb belanget, soll Ir May(estä)t am ersten bei den teutschen chur und fürssten richten, so wöllen alßdann die stendt gern das ubrig thuen.
Was die kriegs ordnung belanget, ist yeder man gar wol zufriden unnd willig. Nach der heiligen drey könig tag sollen die ausschuß von allen landenn alhie zue Praag zusamen khommen.
   2] Was der schulden last belanget, weil die stendt sehen, das die nott vor der handt, so haben sy bewilligt zu abzalung der schulden, was in Böheim ist, die hernach volgende teil.
Erstlich von jedem strich waitzen, der aus dem landt gefuert wirdt, 6 wg, wer von einem strich maltz 5 wg, wer von einem strich gersten 3 wg, wer von einem strich gersten maltz 2 ½ wg, wer von einem strich korn 5 wg, von einem vaß wein ain taler.
Nun volgt, was im landt verkaufft und gegeben soll werden.
Item von einem strich waitzen 2 wg, wer von einem strich korn 2 wg, wer von einem strich abriss  2 wg, von einem strich  hirsch 2 wg, uter von einem zuber karpffen 5 wg mer, wer umb hundert taler höchten verkaufft 5 taler, uter wer umb 100 taler keeß und putter verkaufft 5 taler, wer von einem centner woll 5 wg, wer von 1000 taler par gelt 6 taler, item mehr von jedem aimer wein 2 pindt der ausgeschenckht wirdt, wer von jeder lagel allerlai suessen wein ain taler. Wer von allerlai silber, goldt und kleinoter was verkaufft wirdt, den 15 d.
Item allerlai nation, was nit Beheim seindt, 2 taler die selben von yedem haubt zalen, wievil soll erst heut verglichen, deßgleichen von allen juden. Item es sollen alle guldene und silberene stuckh, so wol silberene und guldene possemeä, auch gulden rosen und knöpff, deßgleichen sammat auf sammat verpotten sein und nichts zuegelassen, allein sammat, atlaß, damast, taffet und allerlai gemaine sey die wahr, doch khain ellen uber 4 taler bei verlierung aller wahren.