Cod. 8959 - 693r-694v

23.12.1586
Signatur: 
Cod. 8959
Folio: 
693r-694v

Zuordnung:

Sprache:

Erwähnte Orte

Name Zusatz Identifizierung Erwähnungen insgesamt
Böhmen Region
181

Erwähnte Personen

Titel Funktion Identifizierung Erwähnungen insgesamt
Rudolf II. Kaiser
2139
Ferdinand I. Kaiser
8
Maximilian II. Kaiser
400
Rosenberg, Wilhelm von Amtsträger
36
Kinsky, Johann Militär
4
Skalský z Dubu, Mikuláš Amtsträger
1

Transkript

Auß Prag vonn 23. December
   1] Den 14ten diß ist der landtag alhie beschloßen, die behmische landtstände erbieten sich gleichwoll, Irer Ma(jestä)t etc. schulden vonn khayser Ferdinando unnd Maximiliano etc. hochloblichster gedächtnuß zuebezallen, dieweillen aber ain neues ungelt auf getraid in- und außländische wein unnd andern wahren zue schlagen, wie weit es sich daßelbe inn 5 jaren erstreckhen würdet abzuelesen.
   2] Ir werdet vor disem verstanden haben, was man vom herren Khinsky (ainem fürnemmen landtman im khönigreich Behem, der bey 3 khaysern hero sein aufnemmen unnd lestlich auch burggraf ann Kharlstain, da auch die khönigliche cron ligt, gewest) gesagt, das er crimen lese majestatis beganngen unnd diß orths in viellen puncten übell gehanndlet, was nun dieselbigen sein, khan man so aigentlich nit wißen, laßen sich auch nit schreiben, wider denselben haben Ir Ma(jestä)t etc. ain process wellen ergehn laßen, unnd in was gestalt sollicher actus in Irer Ma(jestä)t etc. tafell stuben offentlich unnd vor meniglich fürganngen, ist auß beygelegter copey zuersehen.
Sonnsten hiebey auch zeittung auß Grätz, den 18ten Decembris anno 86 umb 9 uhrn vormittags ist ainmall der lannge vonn meniglichen gehoffte process wider denn herren Hansen Khinskhy erganngen, wie hernacher volgt. 
Namlich obgedachte stundt hat sich Khinskhy auß bevelch Irer Khay(serlichen) Ma(jestä)t etc. inn derselben ritter stuben erzaigt, beneben ist die ganze landtschafft oder officier auch berueffen worden, Khinskhy hat sich außer der schrannckhen (welliche wie andere mall zuegericht) halten mießen, Irer Khay(serlichen) Ma(jestä)t etc. session war mit allem ornat wie gebreüchig under dem himell gestelt, so balt Ir Ma(jestä)t etc. sambt den behmischen ständen und bloß fürgetragnem schwert auß der camer inn die ritter stuben khommen, hat der Khinskhy sein anbringen obiter auß ainem zetell doch auf behmisch unnd ungefar mit disem inhalt fürgebracht, wellicher herr Schönfeld als behmischer vice cantzler vor Irer Ma(jestä)t etc. verteutscht.
Aller gnädigster khayser, khönig unnd herr, Khinskhy eingebrachte bitt ist an dem, das er Euer Röm(isch) Khay(serliche) auch zue Hungeren unnd Behem Khö(nigliche) Ma(jestä)t aller unnderthänigste unnd aufs aller höchst es immer sein khan, gehorsammiste bitt, die wellen ime verzaichen, vergeben unnd ine mit khainem process fürnemmen, dan er nicht gedenckht mit seinem khönig unnd herren zuerachten, was er wider Euer Ma(jestä)t hochait unnd ehren gethonn, sey solliches vonn ime nit auß fürsetzlicher weiß unnd muetwillen, sonndern villmehr auß seinem unbedachten mueth unnd unverstandt beschechen unnd gebe sich also hierauf allain auf Irer Ma(jestä)t etc. gnad.
Auf solliches ist ain weill still gehalten, Irer Ma(jestä)t camer procurator mit fürgenommen process fort zuefahren, doch durch den herren purggraven still zuehalten gebotten worden,
Ir Ma(jestä)t etc. sambt den officieren sich der antwurt berathen unnd also durch herren purggraven gnädigst fürhalten laßen, obwoll Ir Ma(jestä)t etc. gnuesam ursach hetten, ainen ernstlichen unnd befiegten process (andern zue ainem exempell) wider ine fürzuenemmen, damit er aber underthänigst erkhenne, das Ir Ma(jestä)t sein unnderthänigst abpiet beneben der gantzen landtschafft unnd stände große intercession, auch in ansechung seines weibs unnd khinder, aller gnädigst ansechen, so wellen Ir Ma(jestä)t ine Khinskhy hierauf zue gnaden aufnemmen, was gnaden es aber sein, sollen ime hernach conditionaliter angezaigt werden.
Auf  dises ist Khinskhy inn die schrannckhen gelaßen worden, vor Irer Ma(jestä)t zwaymall nider khniet, selbst Ir Ma(jestä)t seines verbrechens also khniende umb Gottes willen umb verzeihung gebetten, aber wie khlainmüetig alle reden vonn ime beschechen, man meniglich erachten.