Cod. 8961 - 681v-682r

Auß Wienn von 8. dito
   1] Neues alhie diser zeit sonnders wenig, dann das der bassa zu Ofen neulicher tagen mit inn 8000 mann zue roß und fueß starckh sambt ettlichem bey sich habenden veldt geschüz außgezogen, unnd allbereit ein fürnembe vösstung inn Hungern, Löbens genameth, belägert, da er dise vösstung einbekhommen, solten alle bergstätt verloren sein, unnd seye der graf von Solms auß der vösstung Schmenda auch gewychen, da disem also, das Schmenda durch gedachten bassa erobert unnd verlohren sein solte, haben wir nit bessers, dann des türggen vor Wienn unnd Prespurg zuerwartten, welches der gnedige Gott verhüetten wölle.
   2] Post scripta
Alls nun obgedachter bassa seinem intent nach ein blockhhauß nahendt bey Treyla unnd Stetschin aufzubauen bedacht, daselbsten er einen paß auf bergstätten verlegen wöllen, wie auch gehen Cascha unnd die unnsern dessen guete khundtschafft eingenommen, sein sie ime bassa geschwindt auf dem halß gewesen, alßbaldt er sich mit gannzem hauffen unverrichter sachen widerumben zurugkh nach hauß begeben, also man gueter hoffnung, weil ime Nadasty Jotanny, die von Ehrlo, Callo, Wesbrin und Doggay sambtlichen eylendts nachstrayffen unnd auf den dienst wartten, werden sie dise noch erdappen, müessens den zehenden dahinden lassen, zu welchem Gott der Herr glückh verleyhen wölle.