Erwähnte Orte
Erwähnte Personen
| Titel | Funktion | Identifizierung | Erwähnungen insgesamt |
|---|---|---|---|
| Matthias | Kaiser |
589
|
|
| Siebenbürgen und Polen, Stefan Báthory von |
312
|
||
| Maximilian von Österreich |
593
|
Transkript
Aus Wien von 19. December
1] Die F(ürstliche) Durch(lauch)t ertzherzog Matias seindt verschine täg allher khommen.
2] Der pollnisch gesant allhie tringt noch starckh darauf, damit seinem khönig die vöstin Sackhmar eingehändiget werde, daz würdet aber mit lieb nit geschechen, wie dann daselbsten hin mehrere fürsechung verordnet worden unnd vernimbt man, daz der khönig vonn Polln nachent Oberhungern zuem krieg aufgebotten unnd umb daz geschütz auch munition zuefüehren 500 pferdt zuebestellen bevelch geben habe unnd noch gäntzlich entschloßen, sich umb Sackhmar (alls sein erbthaill) mit ernst anzunemmen, wa die güete nit mag statthaben.
3] Die türggen pauen allenthalben auf den gränitzen, besorgen sich, weill die F(ürstliche) Durch(lauch)t ertzherzogen Maximilian etc. inn Oberhungern ziechen soll, Ire Durch(lauch)t mechte dero orthen inen schaden zuefüegen.
4] Zue Palloda haben sich etliche pribeckhen alda einzig weis eingeschlaifft, inn mainung, also mit lischt daßelb haus zuerobern, demnach sich aber solliches entdeckht, sein dieselbige gefangen worden.
5] Der beeg vonn Jula hat einen hayduckhen weyda seiner gefängckhnus halber umb 800 taler ranzioniert unnd ledig gelaßen, dieweill er aber solliches zubezalen inn seinem vermögen nit gweßt, hat er sich mit 30 seiner gesellen aufgemacht unnd bey nacht zue Jula einkhommen unnd alle glegenhait abgesechen, alls er aber darüber gefangen worden, hat er durch ain mauren brauchen unnd dem gedachten beeg inn sein schatzcamer (der damalls nit im schloß sondern im fleckhen gelegen) khomnen unnd daselbsten hinweeg genommen, was er unnd seine gesellen haben ertragen khönnen unnd zue Sackhmar sicher eingebracht unnd also ein große summa gelts ann goldt, deßgleichen clainatern vonn edellgestain gar cöstlich inn golt unnd silber erobert, dann auch vonn zöbell unnd luxfuetter am großen werth, under wellichen clainatern ain dolch mit ainer guldin schaiden, so mit 110 edlen gestainen versätzt, item ain gürtell auch mit goldt unnd edlen stainen geziert, diese baide stuekh haben sy dem obristen inn Sackhmar vehrehrt.
