Cod. 8954 - 249r-249v

Aus Wien vom 7ten September anno 1581
   1] Die türggen umb Canischa von etlichen orten haben sich jungstlich biß inn die acht hundert starckh gesamblet unnd nachent uff Canischa gegen dem gmöß bey St. Niclas hundert marthalogen fürangeschickht, wie nun die unsern deren gwar worden, unnd das sie uber das gmöß sezen wöllen, verstanden, hat der verwalter des obristen bevelchs zwäyhundert teütsche schützen unnd etliche hungerische fueßkhnecht hinauß geschickht inen fürzubringen, die türggen haben aber auß den hallten gesprenngt unnd funfftzig teütsche khnecht, dann sie sich inn vier hauffen abgetheilt gehabt, angriffen, darauß sibenundzwaintzig erlegt unnd gefangen, sambt etlich wenigen hungerischen fueßkhnechten, mann hatt den unsern zu hilff khummen mügen, das hungerisch kriegsvolckh aber eben der zeit auf die winndische gränitz mit dem graven von Serin außgezogen gewest.
   2] Auf den windischen gränitzen haben die türggen auch etliche einfäll gethon, endlich haben sich die unsern auch gar starckh gesamblet unnd auf die türggische dition geraiset, haben ein ganntze gegent verheret unnd verbrennt, bey sibentzig person, mann, weib unnd kindt, etlich hundert stuckh viech unnd bey vier tausend schaf darvon gebracht, also das sie wol wider bezalt worden.
   3] Herr Weickhart freyherr von Auersperg ist jungstlichen den crabatischen gränitzen, da er obrister gewest, auf einer raiß inn ein erplickhliche krankheit gefallen, also das er inner wenig stunden verschiden, mann maint, es sey der schlag gewest oder es sey auß einem ubrigen trunckh geschehen.
   4] Vor dem ledsten Augusti auß Grätz khummen unns erinnerung, das der unrhuerige Ferhat beeg im closter mit etlichen vil beegen inn beraitschafft sey, Wikitsch, das eüsserste gränitz ort inn Krabaten zubelegern, soliches schreibt auch der haubtman daselbs, Sebastian von Lamberg, ob nun solches inn wehrenden fridstandt nit aller dings glaublich, so ist es doch nicht minder an die Kay(serliche) M(ajestä)t etc. gelangt worden.
   5] Der sultanische gesanndter ist noch zu Prag, soll in kürtze widerumb alhie ankhummen.
   6] Von der moscowitterischen, polnischen und siebenbürgischen handlungen ist außer dem des künigs nunmehr fortzug unnd etliche scharmüzel geschehen, etwas still.