Cod. 8955 - 265r-265v

Auß Wien vonn 26. Marty
   1] Wir haben allhie ann unserem hof schreiben vonn Constantinopoly vonn 24. Feber, das noch ain persianische pottschafft dahin khommen solle, dann solliches deß beglerbeg Arirum unnd cars tihaia , das ist hofmaister, für gewis anzaigen, welliche damalls ghen Constantinopoly ankhommen, doch steht der fridschlus zwischen inen noch inn weittem feldt, dann sultanus will ohne Servan den nit schließen, will das wider haben, entgegen wollen sich die persier deßen nit begeben, werden ehe weitter kriegen, deßen ain anzaigen, das den silichter aga bevolchen worden, mit seinen leütten gefaßt zue sein, unnd dem beglerbeg vonn Siros, das er auff Demicapy, das ist ad portas ferreas (da der Osman Bassa ligt) ziechen soll.
   2] Markazy stet noch umb Sibenbürgen, Sinan Bassa fürdert in, der khönig vonn Pollen wollt in gern zue sich inn Pollen bringen, verhaisst in zuem großen herren zuemachen, will ime deß Bekhes wittib geben, aber Markazy will ime nit trauen.
   3] Es ware auch die red damalls vonn ainer großen armada, die heur soll ausfahren, wie man dann auch bevelch lassen außgehn, knecht zue den ruedern zuebringen.
   4] Der francösisch orator treibt die sachen starrckh, segt vonn ainer großen liga, welliche die christliche potentaten mitainander haben, den sultan desto ehe damit heraus aufzuebringen.
   5] Mit dem grafen vonn Serim haben Ir M(ajestä)t über den obristen bevelch zue Canischa vast geschlossen, die khraishauptmannschafft dißhalb der Tonau wirtt im darzue geben.
   6] Die teutschen reütter zue Canischa wirt man abdanckhen, entgegen werden 50 archibusier zue denn vorigen 100 unnd zue der khraishauptmannschafft (welliche bey 4 jaren herumb gefiert) 150 hussaren unnd 100 hungerisch fueß knecht vonn neuem aufgenommen.
   7] Die canischen archibusier sein for etlichen tagen auf deß herren graf Julius vonn Salm unnd deß Poppels güetter gezogen, die pauren haben sy nit einlaßen wellen, sein darüber zue straichen khommen unnd der pauren inn die 20 erschoßen unnd geschädigt worden.
   8] Die ordinari present soll nhun täglich hieher raichen, dieselb wirt Steffan Niari, ain hungerischer landherr, der Kay(serlichen) M(ajestä)t panetier, hinein nach Constantinopoly fiehren.
   9] Noch ist unserer rais nach Augspurg nichts grundtlichs anzuezaigen, mechte wol for anfang khünfftigen May nichts daraus werden, manglen noch vill sachen zue sollicher rais.