Cod. 8959 - 695v-696r

Aus Wien den letzten December anno 86
   1] Am heyligen christag haben deß herrn Erdeödi baans in windisch landt gesandte, so vier vom adel und haubtleuth gewesen, der F(ürstlichen) D(urchlauch)t ertzhertzog Ernssten deß beegs von Zernickh kopf auf ein rotten taflet und töbicht und ain gefangnen aga sambt 4 fannen und ainer trumel Ir Durch(laucht) von kirchen gangen presentiert. Der Allmechtig verleich weitter sein genad.
   2] Die kriegsleuth von Tottis haben bei Ofen dem feindt uber 1100 schaf weggetriben.
   3] In der christnacht haben die turggen dem bischof von Neutra ain dorf, so sich ain zeit lang der huldigung enzogen, mit namen Bodok aufgehebt unnd 17 personen weggefuert.
   4] Innerhalb 10 tag sein die turggen zwo meil nahent an die statt Schemnitz khommen unnd zum ersten drei personen, dise nacht aber den 29. December auß dem nechsten dörffel, Steplitzhof  genant, zwen puchsen schuß von der Schemnitz auf derselben statt grundt gelegen, darinn köhler unnd huetarbeiter wohnen, umb welche revier vil berckhwerch, puchwerckh und schmeltzhütten gelegen, zehen personen hinwegg gefuert und ainen nidergehaut.