Cod. 8960 - 270r-270v

Aus Prag von 21. July
   1] Die pollnischen stende haben sich bey 3 wochen herwarts zue Crackhau zue versamlen widerumb angefangen, alda ist man täglich deß moscovitters pottschafft gewertig gewesen, wellichem vil der cron Polln den vorgang gonnen, all die weill sye derselben für grosse wolfarth hielten, wann die Moscau auch darzue incorporiert wurde, neben den, daz diser moscauisch herr nit gar von hochem verstandt und deßwegen der pollnischen nation (allß die gern inn maister libertet lebten) desto tugentlicher were.
   2] Ermelte littauer haben zue irer ankhunfft sehr frembt befunden, daz die ander stende der cron Polln armatu manu und sonderlich der groß cantzler mit 4000 pferden und 2000 zue fueß auf den wahltag erscheinen, derent halben sye protestiert, ihres thaills auch nit inn die schate zuegehn noch zuer wahl zuegreiffen, ehe und man alle sachen zue mehrern unpartheyschen sicherung anstelle, auch inen ettlicher irer presentsiones zuevor abhelffe.
   3] Deß hauß Österreichs wie auch sibenbürgische oder batorische gesanten seindt bis ultimo Juny noch nit zue Crakhau einkhomen gewest, deren thete man doch baldt verwarten.
   4] Von versamlung etlicher chur- und fürsten zue Naumburg in Thüringen hatt man bey hof also aber noch khain wißen, was entlich die tractation, vil weniger der beschluß sein werden.