Cod. 8960 - 416r-416v

Aus Prag vonn 6. October
   1] Gestern abents seindt zeitung alhie einkhommen, das der khonig Maximilian den 2ten diß zue Troppa angelangt und willens gewest seie, des tags darauf gehn Ratibor zue rhaisen, dan obwolln zuvor die rhais uff Pleß angestellt worden, hat sich doch befunden, das der weg daselbsten zue tieff und nit wol durch zuekhommen gewest.
   2] Die gemaine raitt und vermuetung ist, das Ir Kho(nigliche) Ma(jestä)t heit oder morgen zue Cracau ankhommen sollen, die wolten nachmalls gern montag (als S[erenissimus] Maximiliani den 12ten diß, wellicher auch ir geburtstag ist) die cron empfangen, darzue meniglich guete hoffnung hat, weill man von ainicher gegen beraithung nit hört.
   3] Ungefahr vor 8 tagen seindt zwen gaistliche aus Polln hieher khommen, welliche die khonigin et factio contraria zue der Kay(serlichen) Ma(jestä)t etc. abgeförtiget, bey deren sy heut formittags audienz ghabt, der innhalt soll (sovil man noch vernimbt) gewest sein, erstlich ain gruess von der khönigin und dem erzbischoff von Gnesen, nachmalls erzölung irer wahl unnd mergckhlicher ruem oder exaggeration derselben, neben depression der andern, quam a minore imo nulla parte factam dicere avisi fuere.
Beschlueslichen ain begern, Maximilianum vonn seinem vorhaben abzuenemmen, damit allerley weiterung, auch schümpff und verclainerung, so daraus entstehe, vermitten pleiben mechte, dan ainmall sy entschloßen, das eüßerst (bey erhaltung irer gethoner wahl) aufzuesezen, zue welichem ende die khönigin allberaith iren schatz aufgethon und angriffen.
   4] Darauf die Kay(serliche) M(ajestät) etc. durch herren Kurtzen antworten laßen, den grueß von der königin nemme sie mit freüntlichem danckh an, die andere anbringen aber sollen die gesante schrifftlich übergeben, die wellen Ir Kay(serliche) M(ajestät) etc. irer wichtigkhait nach neben andern iren geschäfften glegenlich berathschlagen laßen und inen den gesanten als dan beschaidt darauf geben, entzwischen sollen sy allhie mit geduldt verharren und von hinnen nit verruckhen.