Cod. 8960 - 601r

Aus Prag von 22. December anno 87
   1] Jungst ist angezaigt, was gestalt Ir Durch(lauch)t ertzhertzog Maximilian (nach verlohrnem sturm vor Cracau und bei 5 inn 600 mann) sich von dannen mit irem leger auf 10 oder 11 meil bis gehen Beüten zue rugg begeben, alda das winter leger zuhalten, weil es daselbsten schon grosse kältin hat, des vervolgt noch also, unnd das inn gemelter niderlag herr Hans Jacob Kurtzen brueder (Engelbert Kurtz obrister) durch ainen henckhel geschossen worden, und deßen fenderich (ain gar wackherer herr), so des herren Georgen Cristoffen Teyffels freyherren brueder gewest, todt gebliben.
   2] Jetzt will man hie sagen, der schwed seye schon inn Cracau und habe auf 20. dis sollen gecrönet werden.
   3] Der F(ürstliche) Durch(lauch)t Maximiliani fürnembste kriegsräth ziechen alle widerumb nach hauß, als nemlich herr Laßlau Poppell, herr von Bonewitz, herr Johan Cobentzel unnd anndere.
   4] Herr Cristoff Sborowskhi ist gestern auf der post allher khommen, der gibt noch gueten trost auf Maximiliani seiten, daz nämlich der sachen noch wol zuhelfen sei, solle sich auch vernemmen lassen, nach Italia zu ziechen, daselbsten etlich 1000 patiti aufzubringen und Irer F(ürstlichen) D(urchlauch)t zur hilff zuzefieren. Der Teyfell aber vertraue fürohin den gottlossen pollaggen.
   5] Sonst gibt man allhie widerumb laufgelt unnd nimbt teütsche knecht an, deßgleichen solle zu Regenspurg und sonsten oberhalb auch geschechen. Gott welle, daz es nit zue spat seie.   6] Die littauer haben sich noch nit verglichen, auf wellicher seiten sye sein wellen.