Cod. 8962 - 230v-231r

Auß Wyen von 29. Apprill anno 89
   1] Alhie haben wür nichts sonnders schrifftwürdigs, allein daß inn disen lannden grosse brunsten sich erzaygen, wölche von böesen leüthen angezynndt werden auff 5 unnd 6 meyl weegs von dannen, alß zue Mysselbach, Wylffersdorf, Bäßdorf und Asperen, so inn einer wochen sam außgebranndt, mann hatt ettliche böeßwichter gefangen, sollen bekhennen, daß sye pollackhen sein, vermuettlich vom canntzler außgesanndt, unnd daß irer inn der zaal bey 48 sein sollen, sonnssten würdet allenthalben guette waacht gehalten, so ist alhie inn der statt vor 8 tagen ein […]   bey tags zeyt, daß andermal umb 1 uhren inn der nacht feur außkommen, aber gleichwol von unnß hatt grossen schaden gethon. Gott wölle hinfürtter weytteren übel gnädig fürkhommen.
   2] Morgen würdet ein stattliche pottschafft von hie auß nach Constantinopoli abgeförttiget, alß nemlich der praesident, ein herr von Mallau genannt, fürnemmes geschlechts.
   3] So ist am verschinen freyttag abenndts nit sehr weyt von hiessiger statt ein gewalttigs schiff mit meel geladen durch die fortuna und sturem wynndt zue grunndt ganngen, darauff ettliche persohnen erthrunckhen. Gott trösste die interessierenden.