Cod. 8962 - 511v-512r

Auß Prag von 6. September
   1] Wir haben alhie gewisse zeittung, das erzherzog Maximilianus auff 7. diß auf dem teütschen boden (allda Ir D[urchlauch]t vor disem gefanngen worden) auff freyen fueß widerumben ledig gelassen solle werden, dem ziehen ohne gefahr biß inn 1500 reütter entgegen, allso zuverhoffen, Ir D(urchlauch)t auffs lenngst 24. diß alhie annlangen möchten.
   2] Wie man vernimbt, soll der türckhisch bassa durch Sybenbürgen den pollaggen mit 70 inn 80.000 mann inns lanndt gefallen sein, die fesstung Camenitz alspalld belägert, darvor ihme nit mit gerinngem verlust seins volckhs drey stürm abgeschlagen worden, hergegen aber 400 pollaggen, so vom cantzler voran geschickht, unversehens uberfallen unnd alle nider gehauen worden, da die pollaggen was khönnden, werdens sye es wol von nöten haben, unnd wie man alhie ausgibt, zeucht der cantzler selbsten persohnlich, umb die gemellte fesstung zuentsetzen. Was weitter volgt gibt zeit.
   3] Auß Ungern würdt geschriben, daß der türgkh die cossaggen, so dem königreich Polln unnderworffen, überziehen wölle unnd den paß durch Sybenbürgen zuenehmen, welcheß ime der governator gewaigert, enndtlich aber der türgkh mit macht den fortzug tentirt, aber die  sybenbürger sich zur wöhr gesetzt unnd ein treffen miteinannder gethan, das also die sybenbürger den sieg erhallten unnd über 3000 gebliben sein sollen.
   4] Auß Polln schreibt man sonnst, das der jung könig bey seinem vattern zue Narva seye, ihne daselbsten zubesuechen, daß auch demselben könig von der hetzigen seiner gemahel der königin ein junger sohn (wie vor disem vermellt) geboren, wirdt noch allso confirmirt.