Cod. 8963 - 396r

Auß Prag vom 12. Juny anno 90
   1] Gestern ist ein curier von Preßlau alhie ankhommen, bringt gewise zeitung, daz der moscoviter die stat Narva (dem schwedischen könig gehörig) 15 tag und nacht continuierendt dermassen beschiessen lassen, daz die statmaur an einem orth 30, an zweyen 24, und am dritten orth 9 clafter weit hernider gefallen, also daz er sich derselben stat auch sonsten noch einer vestin, so vor diser zeit seinig, aber von dem schwedischen könig eingenommen gewesen, impatroniert, der solle jezo mit seinem ganzen kriegshör, so in 130.000 starckh, für zwo andere vestungen sich gelegert haben, dem geschehe gleichwol wenig oder gar kleiner widerstandt.
   2] So ist den vergangnen sontag der ungerische canzler alhie todts verschiden, dessen und allen christglaubigen seelen Gott gnad.