Cod. 8963 - 809r-809v

Auß Prag von 21. November
   1] Inn Polenn rüsten sich baide partheyen starckh auf den könfftigen lanndtag, unnd verlauttet desselben konigreichs stänndt begeren freylich an Sigmundum, er solle sich lauter erclären, ob er von inen auß dem lanndt zuestellen gesynnt seye, damit sie bey zeiten nach einem andern konig trachten mögen, dieweilen er sich doch sovil habe vernemmen lassen, daß man geren seche, daß er (wie andere konig) darvon lieff, welle deß wegen ohne daz geren plaz machen.
   2] Herr Reichart Streyn ist alberait von wegen der Kay(serlichen) Ma(jestä)t etc. nach Warschau verraisset, der solle nit weit von Beütten zum bischoff von Preßlau stossen, wellicher dan schon mit 300 pferdten im anzug ist inn kayserlicher legation nach Warschau, dahin solle der polnische groß canzler mit etlich tausent man starckh unnd wol armiert willens sein zuerscheinen mit intention, dem jungen Battori zue der polnischen cron zuehelfen, im fahl der schweed nit lang bleiben wurde wellen, inn suma man vernimbt, es mechte sich uf könfftigem tag zue Warschau allerley unruehe unnd selzame practicen erzaigen.
   3] Der herr von Hornstain ist ob dem deputation tag zue Franckhforth alhie widerumben ankhommen, der bestettiget, das dieselben deputierten nicht allerseits mit guetem willen voneinander geschaiden seindt.
   4] Die brandenburgische, bayrische unnd florentinische gesanndten, so sich alhie befinden, haben bey der Kay(serlichen) Ma(jestä)t etc. biß dato noch nicht audienz gehabt, unangesechen, daz höchstgedachte Ma(ajestä)t etc. heut 8. tag ab der jacht von Brandeyß widerumben herein khommen seindt.