Cod. 8963 - 871r-871v

Auß Prag von 21. December bey einer extra ordinary post anno 90
   1] Dise tag ist ein niderlendischer pfaff gefenckhlich eingezogen worden von wegen er sich vernemmen lassen, er welle der Röm(isch) Khay(serlichen) May(estä)t etc. ab der welt helfen, gleich wie der mönich dem jungst endtleibten khönig inn Franckhreich, alß nun dieser pfaff durch etliche Irer May(estä)t etc. verordnete herrn hierüber examiniert worden, hat er zulezt bekhanndt, habe ein haimbliche conspiration gehabt, Ir May(estä)t etc. unnd behaimbischen canzler umbzubringen, aber dessen ungeacht haben doch Ir May(estä)t etc. die wol verdiente schörpfe gegen ime eingestellt unnd allain bevolchen, bemelten pfaffen hinauß in die abbtey Ausee (8 meil von hinnen) zueführen, unnd daselbsten starckh verwahren lassen.
   2] Sonnst haben etliche leuth alhie ein falsches geschray gemacht, samb wollten die catolischen jezo khonfftigen weynachten die hussiten inn iren khirchen uberfahlen unnd alle umbbringen, dero halben die Khay(serliche) May(estä)t etc. ein ernstlich mandat (wider dergleichen erdichtes außgeben) publicieren unnd bey leibstraff verbietten lassen, daß hinfüro niemanndt mehr darvon reden solle, seindt auch etliche deß berüerten berueffs halben verdachtliche personnen gefengckhlich eingezogen worden.
   3] Auß Polln haben wir anderst nichts, dann daz dieselbige lanndtherrn unnd adlthumb jeder aufs störckhest müglich nach Warschau auf den lanndtag verraissen, daselbsten ist der bischoff von Breßlau (Khay[serlicher] May[estä]t etc. gesanndten) schon ankhommen unnd wie verlaut, der craccauisch weyvoda vom groß canzler widerumb abgefahlen sein sollen, der ine doch zue solcher weywodschafft befürdert hat.
   4] Der herr von Borin, welchen etliche rauber (wie vor disem geschriben unversehens uberfahlen) unnd inn 20.000 taler pargeldt unnd geldts werth genommen, der hat ein bierschenckhen, seiner unnderthonen ainer, alher in die gefengckhnuß der alten statt Prag gesanndt, bey welchen etliche sachen (so gemelter von Borin im blündern verlohren) gefunden, der ist hart gebeiniget worden, hat aber bißhero nichts bekhennen wellen, allain angezaigt, habe solch ding, als die rauber verzert oder fahlen lassen, aufgeklaubt. Ob er nun recht schuldig oder nit, möchte sich teglich offenbaren.
Sonnsten kann man den rauberischen buebengesindt nit genuegsam nachstellen, umb die strassen zueseubern, seindt doch biß in 10 erdapt unnd gehenckht worden, aber noch kainen rädlensfüehrer bekhommen.