Cod. 8961 - 468r-469v

Auß Prag von 10. Augusti
   1] Den dritten diß gegen dem abent seindt die 4 ertzherzogen Ferdinandus, Carolus, Ernstus und Mathias alher khomen, deßgleichen Ir F(ü)r(stliche) D(urchlauch)t etc. ertzherzog  Ferdinandi gemahel, denen alle die Kay(serliche) M(ajestä)t etc. auf ein halbe meil ungefahr biß in 80 gutschen entgegen gefahren, alß sie aber einander ansichtig worden, haben Ir F(ü)r(stliche) D(urchlauch)t etc. sich alß balden von iren gutschen erhebt und der Kay(serlichen) M(ajestä)t etc. (welche sich auch aus irer gutschen begeben) zu fueß einander begegnet und sehr freundtlich einander salutiert, auch volgendts, wie ertzherzog Ferdinandus und Carolus zu Irer M(ajestä)t etc. auf die gutschen geseßen, denen hernacher die ertzherzogin mit iren frauenzimmer gefolgt, und also bey 180 gutschen inn der ordnung durch die alte statt auf daz königeliche schloß gefahren und obgemelten 180 noch bey 24 gutschen gevolgt, welche mit allerley pagaglia beladen gewest.
   2] Inn gemelter alten statt hat sich gewaltige guete musica auf den thürmen befunden und continuiert, biß alles hofgesind alda passiert.
   3] Die burgerschafft inn der alten statt inn harnisch und guetter ordnung sehen lassen, auch under inen einen außschuß bey 100 man gemacht, umb die wachten tag und nacht zu halten, so lang die herrschafft alhie verharret.
   4] Der sig(n)or(e) Vespasiano Gonzaga und duca di Sciviontea, welche wegen der Kön(iglichen) M(ajestä)t etc. (aus Spannia verordnet, der pollnischen sachen alhie beyzuwohnen) ist ettlich tag zuvor mit 28 gutschen alhie ankhommen, jedoch höchst gedachten ertzherzogen nit entgegen gefahren, wie auch sonsten kein anwesende pottschafft.
   5] Deß ersten abents hat ertzherzog Ferdinandus mit seinem gemahel inn der cammer allein ad partem zu nacht gessen, volgenden tags aber alle 4 Ir D(urchlauch)t(en) in publico gessen, gleichfalß volgenden täg, die werden auch gar stattlich von verordneten grafen und hern bedient.
   6] Den 5ten diß seindt Ire F(ü)r(stliche) D(urchlauch)t etc. ertzherzog Ferdinand durch den hiesigen ertzbischoff und capitel empfangen worden.
   7] Volgenden 6ten huius wie auch zuvor sein Ire D(urchlauch)t(e)n alle 4 ertzherzogen der pollnischen sachen und was sich jüngstlich darinnen verlauffen nit allein ad partem informiert, sondern auch welch gestallt der pollnisch groß cantzler durch guete wort die sachen nur zum aufzug zu bringen sueche, das denselben nit zuvertrauen sey, unangesehen seines neben erbiettens, das er anderst nit gemeindt, dann die pollnische sachen dahin zu dirigieren, damit solches dem löblichen hauß Österreich zu keiner verkleinerung gelange solle.
   8] Sontag 7. diß haben Ire D(urchlauch)t(e)n alle 4 bey Irer Kay(serlichen) M(ajestä)t etc. inn der cammer daz mittagmal eingenommen, denen ist sontags zuvor von der Kay(serlichen) M(ajestä)t etc. proponiert worden, sich in den pollnischen sachen zu berathschlagen, die haben solches iren anselichen räthen zu consultiern bevolchen, jedoch jeder ertzherzog insonderheit, wie dann von Ir D(urchlauch)t ertzherzogen Ferdinandi wegen verordnet sein, nemlichen der graf von Ladron und herr doctor Moser cantzler, wegen ertzherzogen Carls der alte herr von Stubenberg und herr Johann Cobentzell, wegen ertzherzogen Ernsten der alte herr von Harrach und herr Andre Küelman kriegsobrister, wegen ertzherzogen Matheasen der herr Strein und herr von Teuffenbach.
   9] Sonsten erzeigen sich alhie vil haubt und bevelchs leut, also auch versuchte dapfere soldaten, und thuet man jedoch erwarten, was der herr von Bernstein aus Polln für ein antwort bringen werde auf der Kay(serlichen) M(ajestä)t etc. begern, das nemlich könig Maximilianus auf der Kay(serlichen) M(ajestä)t etc. grund und boden, da er gefangen, widerumb ohne alle entgeltnuß gestellt werden solle, darnach nur die antwort volge, darnach wirdt man sich mit ernst und inn ander weg auch erzeigen.
   10] Die herzogen von Florentz, Ferrara und Mantua solten dem hauß Österreich ein stattliche summa gelts wider Polln verwilliget haben.
   11] So ist neulich von der Kay(serlichen) M(ajestä)t etc. dem herzogen von Mantua bewilliget worden, das er in seinen armes auch das österreichisch wappen mit einer cron füren möge.
   12] Der savoisch ampassator aber ist vor ettlichen tagen mal content von inen abgeschaiden, dieweil seinem herren und herzogen der titul, vorsitz und praeminentia (vor dem herzogen von Florentz) noch nit geben werden wöll, und hat sich gleichwol der gedacht herzog von Saphoia der reichs steur halben (gegen einem stattlichen nachlaß) mit der Kay(serlichen) M(ajestä)t etc. verglichen. 
   13] Disen abent hat sich ein curier aus Polln vom herrn Seretin erzeigt mit confirmation, daz under den pollackhen sich ein grosse uneinigkait befinde.