Cod. 8962 - 676r

Auß Prag von 28. November anno 89
Neues nichts sonnders dann allein, daz die cathollische und lutterische abgesante von der Kay(serlichen) M(ajestä)t mit disem beschaidt abgefertigt worden, die evangelische wüssten sich sonnders zweivels zuerinnern, was gestalt ire obern und dern vorfarn den romischen kaysern als Carlo, Ferdinando und Maximiliano wie auch yeziger Kay(serlichen) M(ajestä)t mit leiblichen aydt geschworen, auch mit mundt und handt gelobt und zuegesagt haben, sich in die bisthumb und prelaturn chathollischer ortten mit nichten einzutringen noch derselben in iren gewalt zuebrüngen, sonnder vil mehr Irer M(ajestä)t mit leib, guet und bluett um zutragende fähl beizuspringen, auch die jhenigen, so nicht cathollisch und sich umb solche bisthumb und prelaturen mit gewalt understeen anzunemmen, sovil müglich davon abzuhalten. Das sich aber yeziger zeitt etliche vertribne reichs graven understeen und derselben zum thail sich understanden haben (dern namen zu specificiern unnotig), den straßburgischen grossen stift in ir gewalt zuebringen, mit luterischen ja gar calvinischen bischoven zuebesezen unnd ihres gefallens damit zuhandlen, daz solte inen nicht allein nit zuegelassen, sondern da sy nit davon absteen, in die acht und aber acht erclert werden, damit also niemandt wider die billichait beschwerdt und vil mehr die alte herkhomne gerechtigkhait beschüzt und beschürmet, auch daz prennendt feuer gedempfft und unhail verhiet werden müge.