Cod. 8963 - 879r-880r

Auß Praag von 24. December anno 90
   1] Vergangne tag hero ist alhie ein geschray außkhommen, daß die jhesuiter unnd pabstische pfaffen alhie etliche husitische kirchen mit gewalt inn der christnacht einnemmen, dieselben zue irem gottsdienst brauchen unnd behalten wöllen, auch daß sie die jhesuiter schon auf etliche hundert mann kriegs rüsstungen bekhomen unnd inn irem colegio bey hänndig haben, hat sonderlich zue sollichem geschray uhrsach geben, ein mönich so alhie privilegio oder mandat von jungst abgestorbnen pabst  außgebracht, daß ime daß closster unnd kürchen, Emaus genant, sambt seinem einkhommen unnd zuegehörungen ein unnd überantwort werde.
   2] Diß obvermelt geschray ist gen hof unnd für die Kay(serliche) May(estä)t etc. khommen, die haben alßbald bevelch gethon, dißfahls nachforschung zuehaben unnd bericht einzueziehen, hatt sich inn der inquisition befunden, daß durch etliche hanndtwerckhs leuth bey einer zech solliche reden gangen unnd der ursprung daheer raiche, diese seindt auß bevelch Ir May(estä)t etc. durch die raths herren der statt Prag zue red gestelt, unnd inn ir aussag der anfennger dieser reden ein leder gerber gewest, diese seindt alle gehn hof geschickht, alda auch examiniert worden, von wem sie diese reden vernommen oder gehört, in suma es hat sich befunden, daß dieser leder gerber diese saag auf die ban gebracht, wellicher darüber inn der alten statt Prag gefenckhlich eingezogen und erstlich guettlich, hernach peynlich  gefragt worden, wafer er diese reden, der aber sich unwüssendt gemacht, daß er diß geredt unnd da es beschechen, habe ers inn voller weyß gethon, derohalben seindt seine müttgesellen zue ime erfordert unnd selbige aussag inn seiner gegenwertt abgehört, die alle darauf gebliben, daß er solliche reden, ehe sie einigen weyn gedrunckhen, angemeldet und gethon, auf diß haben ine die alte stättmaister mit dem schwerdt zuerichten verurthailt unnd seindt verschinen donnerstag zue Ir May(estä)t etc. gehn hof gefahren, derselben iren sentenz eröffnet, Ir May(estä)t etc. consent unnd bevelch unnderthenigist begert, ob sie mit der execution forthfahren unnd der sachen diß orths nit zuvil oder zue wenig gethon. Waß nun für beschaid sie bekhommen, ist noch nit offenbar.
   3] Auf sollich geschray haben Ir May(estä)t etc. ein mandat inn behaimbischer sprach außgehn unnd allenthalben anschlagen lassen, wie hierbey zuersehen, diß mandat hatt Gott lob daß volckh, so zimlich schwürig gewest, einesthails gestült, dann sie haben sich anfanngs zur defension gegen sollichem gewalt unnd überfahl (da doch inn grundt nichts daran gewest) zuerüssten sich bewöhrt, wie dann inn den stätten seider diß mandats anschlag allerley anordnung beschechen, damit, wann sich waß weytters zutragen sollte, man gefast seye.
Seydthero ist inn disen stätten Praag verordnet worden, daß ein starckhe anzaal burger nachts wachen sollen, auch hat man von hauß zue hauß visediert, wievil jeder burger frembde gäst, wie deren namen, von wannen sie unnd waß ir thuen alhie, daß haben die umbgehende herren Irer May(estä)t etc. unnd gemelten rath der alten statt Praag berichten müessen, auch ernstlich anbevolchen, da einer waß gefährlichs wüßte oder hörtte, solliches Irer May(estä)t etc. und ersternanten rath bey aidts pflüchten anzuezaigen, diß spül siehet noch selzam auß, dann sollte ein verwegner mord- unnd raubersbueb, so sich dieser zeit umb unnd inn disen stätten befunden, ein lehrmen geschray machen, würde keiner wüssen, waran er were und also ein grosses würggen, rauben unnd steelen sein, welliches Gott der herr verhüetten welle.