Cod. 8956 - 113r-113v

Aus Wien von 10. Mayo
   1] Der hungerisch landtag hat sich wider ir viller versehung ghäling zue ainem gueten enndt geschickht, darzu auch etwaz geholffen, daz die Khay(serliche) Ma(jestä)t etc. under anderm firgeben, daz sie zue chur aines wildtsbadts eilen miesen, haben also die vom gemainen adel, dann die prelatten und herren standts sich langest zuvor willig erzaigt, den gebreuchigen anschnidt von der portten 2 jare nacheinander jedes jar 2 daller bewilliget.
Die contua hilff, daz ist von 100 portten 3 hussarische pferdt, die robat von der portten 12 tagwerckh und wie es mit derselben einbringung gehalten werden solle, bleiben bey der alten mainung des landtags anno 78.
   2] Der F(ürstlichen) D(urchlauch)t ertzhhörzog Maximilliani hineinzug in Obern Hungern bleibt bei der hungern ersten erclärung, daz sie nemlich Ir D(urchlauch)t sich auch also gefast mache und hineinkhomme, damit es derselben zue ehrn und dem landt aldorten zue nutz raiche, und daz sich Ir D(urchlauch)t der hungerischen landtleuth zuem regiment und administration desselben obern hungerischen wesens gebrauche, darauf sein Ihr D(urchlauch)t noch im werckh, sich darzue gefast zue machen.
   3] Wie die obbemeldt bewilligung beschechen, sein Ir Ma(jestä)t etc. uff ultimo Apprill mit zierlicher gueter contentierung der hungern abgeschiden und uff Obersdorff gezogen, alda Ir Ma(jestä)t noch verharren.
   4] Das fendle teutsche knecht, so die Khay(serliche) Ma(jestä)t etc. zue Preßburg verwacht, ist denselben dag abgedanckht, 200 knecht darausgeweldt und gehen Lewa und Kärpen uff die berckhstättisch gränitz geschickht worden.
   5] Der Carle Rueber, obrester zue Doggay, ist den 27. Apprill zue Asparn, als er gleich am widerumb ziechen wahr, thodts verschiden, sein brueder der veldt oberster ist umb dieselb zeit auch fast schwach gewest, mit dem besseret es sich aber wider.
   6] Inn Hungern feirt der türgg nit, seind bey 3000 starckh zue roß jungst verschine tag bey Callo eingefallen, 2 gehuldigte dörffer geplündert, 54 personen hinweggefiert, die unsern haben inen gleichwol nachgesätzt, weil sie inen aber zue schwach, nichts ausrichten mögen, der unsern sein im scharmutzell 15 bliben und gefangen worden, entgegen haben sy der türggen auch etliche geschediget und 4 vom hauffen gefangen weckh gebracht.
   7] Deß Somlio Bathorio Istwan (so deß khönigs von Polln nahenter vetter) bey 40 drabanten haben ain dorff Kayda (nahent beim Sackhmar gelegen) geplündert und daßselb denen vom Sackhmar mit gewalt abnehmmen und ime Bathori zueaignen wellen, das mechte etwas stritts zwischen Irer Ma(jestä)t etc. dienstleuthen aldorten und Sybenbürgern abgeben, doch verwarth man in sachen mehrers berichts.