Cod. 8954 - 162r-162v

Aus Wienn vom 23ten Juny anno 1581
   1] Das der weyda inn Sibenbürgen tod unnd jetzo die zwen Bathori, des weyda sun und der junge Stephan Bathori de Somligo, deß regiments halb inn die harr khummen wellen, das continuiert noch immer fort, ein jeglicher dieser beider hat sein anhang, welcher ein jedwederen zu schützen begert, und des verursacht mich, das ein statliche pottschafft von dem jungen weyda an könig von Poln gefertigt wierdet, hiezwischen underlastt der ander das seine auch nit, wie man dann von Erla für gwiß schreibt, das sich die türggen, sonderlich der bassa zu Zumeßwar albereit würren sollen, aber noch zweifenlich ists, welcher port sy hilff thun werden unnd stehet also darauf, das sich ein grosse empörung dieser ortten erheben möchte.
   2] Der bassa von Ofen ist diese tag von dannen auß allein mit 8 nassarn schiffen gehn Gran herauf khummen, wie man vernimbt allein pacierens halb, hat beede obristen zu Commorn unnd Wywar dieser raiß vorher ganntz freundtlich erinnert, mit angehengtem vermelden, er wölle ime drey schaf von nachbaurschafft wegen zukhummen lassen, ist also one alle feindtlicheit wider von dannen abgeraist.
   3] Zu Constantinopel wie man unns von dannen schreibt, ist eine gar stattliche berathschlagung fürgeloffen, dabey der sultan selbs unnd ain stattliche ansehenliche tartarische pottschafft gewest ist, die maiste tractation solle vom persianischen krieg gewest sein unnd sey nun endtlich deß ains worden, das der tartar diß jar still sizen, aufs jar aber mit 200 mann wider den persianer aufziehen solle, die ursach, das er diß jar nit ziehen kündte sey, das sein volckh unnd lanndte ettlich jar hero durch disen krieg sehr abkhummen, zu Constantinopel sey auch gar khein rüstung, sonder mann hoffe und versehe sich immerdar des fridens, der sich auf der türggischen seitten nit ubel befinden soll. Haec ab oratoribus ca[…]  mense Aprili anno 81.