Cod. 8957 - 77v-79v

Verner auß Wien den 23. Marty anno 84
   1] Auß Constant(inopel) haben wir schreiben, das den 17. January ain polnische pottschafft, Petrus Stoßlocoßkhi genand, ungeverlich mit 40 personnen daselbst ankhommen, mit etlich wenig zauschen einbelaitt worden, ist den dritten tag hernach beim Siaus bassa obristen veßir furgelaßen wordenn, auch fur den sultan khumen, alda ime die gewonliche malzeit, wie man gegen den kuniglichen pottschaffter zubeschehen pflegt, in deß sultani pallast gehallten worden, dem sultano hat ers zimer zöbel bracht, der könig demuttigt sich gar, thuet khain meldung seines durch die turggen nidergehauten pottschaffters, hat vil seiner leut, die deß einfalls in der turggen landt ursacher undt mithelffer gewesen, lassen straffen, stelt den ubrigen nach, läst alle gefangene turggen suechen und wider geben, und erzaigt sich in summa wie ein gehorsamer knecht dieser portten, also das die turggen mit ime wider zufriden sein und sich khaines kriegs zwischen Poln und dem sultan zuversehen.
   2] Die spanischen currier, so den 30. December deß nechst abgeloffenen 83isten jars mit schreiben vom Marigliano allein an Siaus baßa widerumb dahin khummen, alß sy gleich im werckh gewest und in guetter hoffnung gestanden, durch unterhalltung deß juden Benuenistes, welcher Marigliano zuvor auch gebraucht und mit versprechung ettlich tausent ducaten ainen neuen anstandt auf daz jetzt lauffende 84 jar zuerpraticieren, ist den 14 diß gedachter jude Benuenistes zu dem herrn immediate abgeferttigt, und der all ir sachen bei dem Siaus baßa gehandelt undt getriben, gleich an einem sambstag, da er seiner tochter hochzeit mit großem bracht gehallten, bei der nacht auß bevelch deß sultani durch ettliche capitschi gefangen undt im Seraglio dieselbe nacht aufgehallten, des andern tags frue aber neben andern zwen furnemen turggen, so beim Siaus baßa nit weniger alß er jude galten zum Uluzali gefuert worden, und sovil man bericht hat, soll gemelter Benuenistes undt gleichßfalß die zwen gedachten turggen beim sultano angeben sein worden, alß sollen sy ein zeithero ine Siaus bassa nach irem selbs willen regiert, vill ambter umb gellt verkhaufft und in kurtzer zeit dardurch reich sein worden, darauf deß dritten tags hernach die zwen turggen auf die galern condemnirt wordenn, von dem juden aber ist noch ungewiß, was sultanus mit ime furnemen werde, und wirdet er der jud in mitels in des Uluzali hauß viler ursachen halben examinirt, und nach gelegenhait er befunden wirdet, judicirn ir vil, daz man inen nach Rhodis, alda er auch zuvor gewest, zum andern mahl relegirn möchte, irer vil sein auch der mainung, er werde schwerlichen mit dem leben davon khummen, dann ob er wol vom Siaus bassa sehr undt hoch geliebt wirdet, so darff doch er Siaus bassa zu verhuettung mehrers verdachts sich so gar hoch seiner nit annehmmen, alß er dann solches beraitt im werckh erzaigt, in dem er vom sultano begert, man solle die justitia uber ine undt seine mit gesellen erkhennen laßen, damit er per indirectum bei den richtern hernach die erledigung aller dreyen durch die dort gebreuchliche mitel (seitemahl irer jeder uber die 100.000 reich) erhandlen undt erhallten möchte.
   3] Den 10ten diß sein zwen capitschi von Caffa auß der Tartarei gen Constant(inopel) khummen, die berichten, das der Osman bassa ungeferlich mit ein 5000 man, thails spahien und janitschärn, so die vergangene jar ime undterschidlich zugeschickht worden, maists thails aber seiner aignen leut berait gehn Bender, ettlich tagraiß von Caffa gegen Connstant(inopel) warts ankhummen seie, unnd habe unndterwegens ettlich tausent reussen undt moscovitter, so daz gellt unnd die munition, welches man vor vil monaten gehn Demir Capi verschafft, aufzufahen undt weckh zufuhren vermaint, nahent aufs haubt legt undt das gellt sambt der munition mit starckher belaittung weitter fortgeschickht, unnd muesse sich daselbst zu Bender wegen der grossen wasser guß aufhallten, vorhabens mit ehister gelegenheit sich gen Constant(inopel) vor den sultannen zu presentiern, und gleich ettlich tag zuvor seind auch ettliche andere capitschi von Constant(inopel) nach Arzrum zum Ferhat baßa, seinen cantzler und spahiglanagaßa in eysen gen Constant(inopel) zubringen verschickht worden, alß man auch fur gewiß helt, er, Ferhat baßa, werde seines ambts entsetzt unnd Oßman baßa an sein stell auf khunfftigen frueling dorthin verschafft werdenn, ob aber sultanus sich entschlossen, diß jar die impresa wider die georgianer mit fueßvolckh, wie er geratten, oder aber die erhebung ainer andern vesstung in der provintz Nayinan, drey tagraisen bei Sernan anzuschaffen und zuverordnen, das ist noch unbewust, aber daz ist gewiß, alß dann deswegen berait alle tag praeparationes beschehen, das gemellte persische impresa diß jar aufs wenigst, wo nit lenger noch continuirn wirdet, unnd den 21. January sein etliche persianische gefangne sambt 70 kopfen von beglerbeg zu Scherczul mit berichten, das er ainen furnemen herrn daselbst nahent aufs haubt erlegt habe, gen Constant(inopel) gebracht worden, vom khünig in Persia aber, wo er sich in der zeit befinde, unnd von der furgegebenen victori usbekhan ist seithero weder vil noch wenig weitter gehört worden.
   4] Deß Aly baßa, gewester baßa  zu Ofen undt jetzo beglerbeg Graciae, disen winter zu Soffia unnd Giaffer baßa, gewester beglerbeg Graeciae bei der Tonau zu Baba an der moldanischen gränitz bleiben soll, das wirdet noch fur gewiß affirmirt, wiewol ir vil daneben vermuetten, da die sachen, wie vorgemelt, allerdings mit den polackhen verglichen werden sollen, sultanus möchte sunderlich auf begern seiner schwester den neuen beglerbeg Greciae die hochzeit mit derselben zuhallten unnd den andern seiner schwachait halben auf sein vilfeltig anhallten gen Constant(inopel) revocirn. Man hat ainmahl von ausfarung ainer armada in gehaimb reden wöllen, alß dann neulicher zeit in die 50 galern erbaut worden, wie dann jetziger zeit 200 neuer galern in arsional stehen, weil aber an galern nicht allain sonder an außrichtung derselben unnd an volckh, so sy fuhren und ziehen muessen, am maisten gelegen auf diese stundt auch gar khain preparation deßwegen gesehen wordenn, wirdt in gemain darfur gehallten, das uber die ordinari guardia ungeverlich von 20 in 30 galern diß jars und khain grose armada ausfahren solle.