Cod. 8957 - 77r-77v

Zeuttungen aus Wien den 21. Marty anno 84
   1] Unnß khummen allerlay warnung ein, das die turggen sich in still unndt ohne große tumult umb die hungerischen pergstett wollten annehmmen, derwegen dann ein fleckhen Statma nahet bei dem schloß Wiglest gegen dem schloß Dywin ligendt, welches die turggen im 75. jar sambt Blabenstain auf derselben bergstatt gränitz eingenohmmen, sich dem beg zu Fleckh huldigen wöllen und alberait zween undterthonnen daselbst iren tribut zusamen gericht und hintragen, aber vom haubtman zu Wyglest am weeg erwüscht und wider zuruckh gefuert wordenn, steet darauf, weil alle bergstett in großer forcht undt derwegen ire gesanndten alhie gehabt, das die Khay(serliche) May(estä)t zu mehrern trost undt versicherung derselben ort noch ein 2 oder 300 man zu roß undt fueß auf dieselb revier auf ein zeit wirdt stellen mueßen.
   2] Herr Christoff Ungenadt wirdt innerhalb 3 oder 4 wochen seines bonn ambts in windisch landt und Crabaten abgedanckht, dasselb seinem dochter man Erdeudi Tomasch gebenn, undt er wirdt wider obrister zu Erla, wirdt alles kriegsvolckh aldorten, das ist 500 husarn, 200 hungerische trabanten der fueßknecht, und ein fendl teutsch knecht von 750 mannen sambt den artolorei personnen, deren auch ein 16 oder 20 sein, auß dem einkhommen allein undterhallten, da bißher Ir May(estä)t etc. alle jar noch ettwas starckhs hinzue gebenn mueßen, gleichwol hievor gar 300 knecht undter einem fendl dorten gehallten sein worden.
   3] Die sibenburger sein in grossen sorgen, dann der turggisch khayser will nit, das der könig von Polln ainiche einkhommen dort her haben solle, will er allein herr dariber sein, wie er dann khonfftig seines gefallens ein weyda hinein wölle setzen, sein also selbst undtereinander wider werttig und gibt ainer dem andern die schuldt, das sy  in daz
ungluckh gerachen, den sy muessen auf zwayen seitten zahlen.
Wien, den 21. Marty anno 84.