Cod. 8957 - 76r

Aus Prag von 3. Apprill neuen callenders
   1] Ainer meiner vätter, so profiandtverwalther zue Canischa, schreiben mir von denen, daz bey wenig tagen die unsern alda 14 turggen und ettliche schöne ross gefangen eingebracht haben.
   2] So wurdet aus Sibenburgen vermeldet, daz der pollnische khönig Battory umb die gantze gegendt inn Sibenburgen ainen bluetigen spieß herumb tragen habe lassen, darmit anzuzaigen, daz er wider den turggen mit gantzem gewallt auf sein wölle, ist aber doch zuebesorgen, er werde zue schwach sein und sich aines anderen besinnen miessen.