Cod. 8962 - 117r-117v

Auß Prag von 7. Marty anno 89
   1] Wiewol etliche tag heero inn gemein der rueff gangen, sonnssten inn polnischen sachen ein vergleichung ervolgt, so haben doch die Kay(serliche) May(estä)t etc. noch khein grünndtliche aviso darvon, wie dann Ir May(estä)t etc. erst vorgesteren dero schlüeßlichen resolution den abgeordneten herren commissary zue geförtiget haben.
   2] Viel abgesanndte auß dem reich seindt alhie, namblich Pfaltz, Sachssen, Brandenburg, Hessen, Nüdersachssen unnd Straßburg, waß ir begeren, kann man noch nit wüssen.
   3] Deß königs von Dennmarckhts gesandter solle auch unnderwegen auff alhieher sein, also haben Ir Kay(serliche) May(estä)t etc. nicht zue feyren.
   4] Auß Sibenbürgen haben wir confirmation, daß nachdem die jesuitter inn derselben lanndts orthen ein zeit heero nicht allein alberaidt viel stattliche heüser und einkhommen, auch vil junger reicher knaben lanndt güetter (die sie hünderruckhs unnd ohne bewilligung deß lanndt fürssten zu andere frembde orth verschickht) an sich gezogen, sonnder auch bey dem gemellten lanndts fürssten inn so grosse authoritet unnd credito gewachsen, daß sie sich nach heer über der regemendt sachen im landt zue underfachen unnd inn denselbigen ordnung zue geben angemasset, ja sogar inn offentlichen predigen wider alle diejenigen, so inen dißfalß zuewider gewest, auff der canntzel starckh vernemmen lassen.
Also haben die landtständ solchen unfueg und eingriff nit lenger dulden wöllen, derhalben den lanndts fürssten benöttiget, ungeachtet er inen den jesuitter hiebevor allen möglichen schutz und schürm zuegesagt, daß er wider seinen willen bemelte jesuitter auß dem landt hinweckh schaffen müessen, umb zuverhüetten, daß sie daß lanndt volckh nit mit gewallt überfallen unnd ine den fürssten vielleicht selbs gar von der regierung absetzen möchten, also hatt er die jesuitter dannacht mit einem zöhrpfenning unnd sicherm glaytt abgeförtiget.