Cod. 8962 - 539r

Ein anndere auß Prag von 20. ditto
   1] Von neüem mittzuthaylen kann euch unangefüegt nit lassen, welcher massen Ir F(ü)r(stliche) D(urchlauch)t ertzhertzog Maximilian zue Österreich Gott lob auß der untreuen, groben pollaggen hännden ohne ainiches jurammet durch vier vertrautte treue dienner, herrn Wilhelmen von Opperntorff unnd herrn Melchiorn Rödern, bede freyhern, wie jüngst auch vermellt fürsichtigelich sambt ainer gewissen anzal bey sich gehabter reütter, alls höchstgedachte Ihre D(urchlauch)t von den pollaggen an die gränitzen beglaittet, den gedachten pollaggen daß jurament (wie es dann bey ihnen alberaitt ja unnd gewis gewest) praestiren sollen, entlediget worden, der gestallt, daß höchstermellte Ihre F(ürstliche) D(urchlauch)t die pollaggen inn ein stadt negst der gränitzen gelegen, so den marggrafen von Anspach gehörig unnd von Kön(iglicher) May(estä)t Behaimb zu lehen küret, ihnen auf ir begeren zuantwortten sye beschaiden, welche pollaggen auch an das bestimbte orth allso erschinen, der hoffnung durch Maximilianum mit gulden ketten abgedanckht zuwerden, daß aber der fromme herr nit verstehen wöllen, sonndern ihnen ihre pollaggische bossen und untreu entdeckht unnd erinnert, auch sich mit kürtze ihnen nit zuschwören erclärt, welches nhun den guetten pollaggischen herrn nit nach den bessten gefallen, darauf sy gantz übel content, ihren weeg wider zu rugck darvon gezogen, allso hatt diese lanngwierige verhafftung dermallen ire endtschafft auch erraicht. Gott wölle Irer F(ü)r(stlichen) D(urchlauch)t sambt dem löblichen hauß Österreych aufgestandtnen contrario gnedige widersetzung thuen.
   2] Unnd seind Ire Kay(serliche) May(estä)t ihreß geliebten herrn bruederen deroselben ankunfft mit erstem verwartten, welche sich dann diser zeit inn guetter leybs gesundtheit auch befinde, sonsten ist eß alhie zue hof still.