Cod. 8962 - 538r-538v

Auß Prag von 19. Septembris anno 89
Den 7. Septembris haben die pollaggen, namblichen der weywoda von Craccau sambt ainem bischoff unnd abt Ire Kön(igliche) Würden Maximilianum  mit 50 gutschen unnd 70 pferdten ann die gränitzen biß gehn Butschim (zwo meil weegs von Peütten ligennd) beglaittet, allda eß ain wasser, welches der Kay(serlichen) May(estä)t lanndt von Polln schaydet, über welches die pollaggen zue roß allß balld sich auf unnser seitten begeben mit dem fürhaben, Ire Kön(igliche) W(ü)r(den) sollten allda allß inn freyem veldt daß jurammet thun, wylln dieselben sy die pollaggen auf freyen fueß hiemit setzten, welches yedoch Ihre Kön(igliche) D(urchlauch)t nit thun wöllen, sonndern begert, das sy mit dero vollendts biß gehn Beütten khommen sollten, allda sy mit ihnen zuvor allerley zureden hetten.
Auf solches den pollagkhen das hertz ettwas entfallen, besorgende, waß darhinnder steckhen müesste, haben sye sich entschlossen, daselbsten allso zuverharren deß versehens, Ire Kön(igliche) Würden wurden irem versprechen nachkommen unnd auf diser stell daß juramentum laissten, wie sy nuhn allso inn disen reden waren, kame der bischoff von Preslau (auß ainem daselbst nahend ligendem wallde) mit 100 pferdten herfür, hinnder den pollaggen her, empfienng Ire Kön(igliche) W(ü)r(den) etc. sambt den polläggen zugleich, dem volgten allspalld auß gemelltem wallde herr Wilhalm von Opperstorff unnd herr Melchior Röder obriste mit 60 pferdten inn gueter ordnung unnd fliegenden fahnen, unnder irern röckhen verborgne rüsstungen, die umbringten Ire Kön(igliche) W(ü)r(den) etc., dessen die pollaggen erschrackhen, triben dieselben den weg vollendts biß gehn Beütten. Demnach sye nuhn sambtlich biß gehn Beütten kamen, stygen Ihre Kön(igliche) W(ü)r(den) sambt annderen der fürnembsten ab den pferdten, welche Ihr Kön(igliche) W(ü)r(den) gewahrsamblich inns logiament beglaitteten, dahin kommen allßbald die pollaggen unnd begerten voriger maßen das jurament von Ir Kön(iglichen) W(ü)r(den) zu prestiren. Allß nun die pollaggen außgeredet, auch beederseits beygeordnete allso da stundten, bringe Ir Kön(igliche) W(ü)r(den) an, ein lannge oration zuthun mit ertzelung alles dessen, welcher gestallt sy die pollaggen die gantze zeit hero mit Ihrer Kön(iglichen) W(ü)r(den) so gar unbillich umbganngen weren, unnder annderm daz die pollaggen nit allain wider die neüen compacten zum offtermal gehandlet unnd sollche gebrochen, sonndern Ihrer Kön(iglichen) W(ü)r(den) (über alle zuegefüegte unbilliche sachen) noch syben articul fürgeschriben und dem cantzler ferttigen müessen, daß auch Ihr Kön(igliche) W(ü)r(den) ann yetzo noch darüber sollichen unbillichen leütten schwören sollte, könndte unnd wüsste Ihr Kön(igliche) W(ü)r(den) über dero gewissen nit bringen, wollten eß auch kaines wegs nit thun, erzellte auch insonderheit, waß der canntzler Ihrer Kön(iglichen) W(ü)r(den) unnd dem hauß Össterreich zu spot für practicen hin unnd wider geführt, da derselbige cantzler zugegen were, wüsste Ihr Kön(igliche) W(ü)r(den), waß auf ain solchen gehörte, neben vermelldung, sye die pollaggen möchten wol nach hauß ziehen, ainmal wolle Ir Kön(igliche) W(ü)r(den) nit schwören unnd ob wolln über solches waigern die pollaggen umb laisstung deß juraments verner angehallten mit erinnerung, waßen sich Ihr Kön(igliche) W(ü)r(den) bedacht, ob dieselbe ein neues bluetbad anrichten wollten, hatt doch solches nichts geholffen. Schliesslich begerte gleichwol Ire Kön(igliche) W(ü)r(den) offt gedachte pollaggen, so zugegen, sollten bey deren f(ü)r(stlichen) tafel verbleiben, volgendts gebürlich verehrt werden, die pollaggen aber wollten nit, sonndern zugen darvon unnd kündten den fryden damit auff, nach disen Ihr Kön(igliche) W(ü)r(den) sich mit den ihrigen gleichwol auch nit lanng zu Beütten verweylet, allso mit dem bischoff von Preslau nach dem stadtlein Neüß getzogen, unbewust aber, ob dieselbe iren weeg auf Wienn oder hieher nemmen werden.