Cod. 8961 - 549r-549v

Auß Prag vonn 30. Augusty
   1] Was inn pollnischen sachen beschloßen worden, hält mann gar inn gehaimb, allain ist die sag, das inn khurtz ain gar stattliche pottschafft in Polln abgesant werden solle, darunder auch herr Niclas Palffy vonn wegen der cron Hungern, sonsten auch herr Joan Kobentzell, hierzwischen wirdet mann in eventum allerlay praparation zuem krieg machen, jedoch zue forderst durch angeregte pottschafft güetliche mitell versuechen.
   2] Den 25ten diß seindt Ir Durch(lauch)t Ertzh(erzog) Matias vonn hir widerumb nach Lintz verrhaiset, ertzh(erzog) Ernst verharret noch allhie, solle jedoch auch täglich fort unnd wie man sagt, auf den donnerstag gewislich auch auf sein.
   3] Vonn Dreßden schreibt mann, daz der churfürscht zue Sachsen seiner Churf(ürstlichen) Gn(aden) jungst geborner tochter freülin Elisabeta khindertauff gehallten habe, darzue sein vonn chur unnd fürstlichen personen gevätternn gewesen der churfürst zue Brandenburg unnd seiner Churf(ürstlichen) Gn(aden) gemahell, landtgraf Wilhellm zue Heßen, herzog Philips zue Braunschweig unnd herr Georig fürscht zue Anhallt, welliche chur und fürstliche personen auf 16. diß noch zue Dreßden gewest, und seyen allerlay rütterspill daselbst forgangen.
   4] Gestern abents ist ain currier vonn Maielandt hieher khommen mit zeyttungen, das die spanisch Armata mit der englischen geschlagen habe, die englische nider gelegen seye, darüber allhie ain groß frolockhen bey jedermann gewesen, ob solliches gewis, wirdet villeicht die ordinary auch etwas darvon mit sich bringen.