Cod. 8961 - 551r-551v

Auß Prag vonn 30. Augusti 
   1] Was inn pollnischen sachen beschlossen worden, helt man gar inn gehaim, allein ist die sag, das in kürtz ein gar stattliche pottschafft in Polln abgesant werden solle, darunder auch herr Niclas Palfy von wegen der cron Ungarn, sonsten auch herr Johann Cobentzell, hier zwischen würdet man inn eventum allerley praeparation zum krieg machen, jedoch zu forderst durch angeregte pottschafft güettliche mittel versuchen.
   2] Den 25. diß seind Ir Durch(lauch)t ertzherzog Mathias von hinnen widerumb nach Lyntz verraiset, ertzherzog Ernst verharret noch alhie, solle auch täglich forth und wie man sagt, khönftigen donnerstag gwis auf sein.
   3] Vonn Dreßden schreibt man, das der churf(ürst) zu Sachsen Irer Churf(ürstlichen) Gn(aden) jungst geborn tochter freulin Elisabetha khindertauf gehallten habe, darzu seind vonn chur unnd f(ü)r(stlichen) personen gevattern gewesen, der churf(ürst) von Brandenburg unnd Irer Churf(ürstlichen) Gn(aden) gemahel, wie auch landtgraf Wilhelm zu Hessen, herzog Philips zu Braunschweig unnd herzog Georg fürst zu Anhalt, welche chur und f(ü)r(stliche) personen auf 16. diß noch zue Dreßden gewest, daselbsten allerley ritterspil fürgangen.
   4] Gestern abendts ist ein curier vonn Maylandt hieher khommen mit zeittung, das die spanische armada mit der englischen geschlagen habe, die englischen nider gelegen seyen, darüber alhie ain großes frolockhen bey jederman gewesen, ob solches gwis, wirdt villeicht die ordinary auch was darvon mit sich bringen.