Cod. 8954 - 13r-14r

Aus Wien
   1] [...]  khommen Aly bassa zue Ofen, so […]  herzlich unnd ehrerbiettig angenommen worden, als khainen orator jhe begegnet, […]  er, orator, hatt von dieser tractation selbs zuerugk nit gnuegsam schreiben khönnen, inn gemain erzaigt sich der bassa auch so wol unnd nachbarlich, als wir von kainem andern gedennckhen, hatt inn gemain noch kain sonderliche klag angebracht, wie wol wir ain zeitt hin umb vil glickhlicher treffen gegen den türggen erhalten, ausser was daz ainig, so herr graf von Serim, Nadasty und Patiani gegen dem beeg aus Bossega, derselb personlich sampt 200 personen (iber die so auch in 200 gefanngen worden) bliben sein, inn suma es ist von dem guetten nachbarlich anerbietten dises bassa nit genuegsam zu schreiben, ist ain guetter hofmann, freundtlich unnd, obwol bisweilen ein fäll geschechen (von den türggen), so sein sy doch mit irem nachthail unnd schaden abgeferttigt worden. 
   2] Vonn Comorn vernemen wir, das die türggen vonn Gran vor wenig tagen daselbst eingefallen und ettliche personen als fischer am ufer aufgehept unnd hinweeg gefiert, darauf hatt man fir guett angesechen, daselbst iber die Thonau ain waachthaus und besatzung aufzurichten, sollicher kleinen unrhue zu wöhrn, unnd daz soll inner wenig tagen ins werckh gericht werden.
   3] Es soll des beeg inn Bossega niderlag denn türggischen khayser so vast schwierig machen, das er willens sein soll, ain zug wider unns fir zunemmen, unnd dis wirdet uns auch aus Constantinopoli confirmirt, an jetzo khomen zeittung, das die türggen iberal uff Griechisch Weißenburg, Jula, Ziget, Ofen und andern firnemmen orthen traidt unnd victualia zusamen fieren sollen, worauf soliches angesechen, wirdet die zeitt gleichwol geben, es mechte uns aber nichts guets augurieren.
   4] Der frid zwischen dem suldan und Persia ist gleichwol noch nit richtig, es solle aber an dem stehn, das er zue richtig khomen soll, wie man dann das persianers ansehenliche pottschafft gehn Constantinopoli gewärttig.
   5] Das geschray, das der türggisch khayser todt sein soll, hatt nit allein dieser orthen, sonder auch wider den türggen dermaßen iberhanndt genommen, das er sich ettliche tag nacheinander offentlich hatt sechen lassen, den falsch ausbrochnen  wahn darmit zu stillen.
   6] Die F(ürst)l(iche) Durch(lauch)t ertzherzog Ernst sein den 11. dis per posta zu der Khay(serlichen) Ma(jestä)t gehn Prag verraist, khünen derzeitt noch nit wissen, was ursach des geschwinden anforderns es sein mues, inn Irer F(ürst)l(ichen) Durch(lauch)t abwesen vertretten ertzherzog Maximilian das regiment alhie unnd das […].