Cod. 8954 - 176r-176v

Aus Wien von 29. Juny
   1] Den 13. dis seindt die türggen abermalls mit schiffen herauf ghenn Comorren khommen unnd die vischer angreiffen wellen, denen ist der herr Küelmann, obrister zue Comorren, mit 21 naßaren schiffen entgegen gezogen, die türggen zue miternacht angetroffen, sye geschlagen unnd ainen fhanen erobert, gleichwol nit mehr als 2 türggen lebendig bekhommen, aber verwundt worden.
   2] Die gefangne türggen haben angezaigt, der beeg zue Graan seye nit anhaimbs, sondern zue Ofen beim baßa, der habe dem Hußan Chaia (so jetzo der maiste rauber zue Graan) herauf zueziechen erlaubt, wellicher for disem ausgesprungen unnd sein huet und seebell hinderlaßen.
   3] Inn Sibenbürgen steet es noch in alten terminis unnd seindt der partheyen zwo, nemlich des jungst verstorbnen Batory hinderlaßner sohn und der junge Steffan Batory de Somligo und zuebesorgen, der türgg mechte (mit einsätzung des Marcazi, wellicher zue Constantinopoly lang darauf gewartet) der drit sein. Gott welle solliches verhüetten, daz er nit als dann besten stain aus dem prett ziehe.
   4] Den 26ten dis ist der herr Rueber, veldt obrister, mit ainer summa gelts, so zuvor thaill aus Schlesien allher khommen, uff Oberhungern verraiset.
   5] Mit Canischa ist man eben meßig inn worth, daselbsthin auch ain anlehen zu schickhen, damit die armen leüth vonn den hussaren nit also beschwert werden.