Cod. 8954 - 233r-234r

Aus Prag von 16. Augusty
   1] Wir haben allhie zeitung und confirmation, das der friden mit dem khönig von Polln gegen den moscovitter aller dings zue rugg pleibt, inn ansehung, daz des moscovitters fürgeben und anerbitten alles nur auf lüscht und betrug gericht, sonderlich daz er gantz Lifflandt abtretten und beschlieslichen durch ain gar stattliche pottschafft wollte handlen laßen.
Darauf dann der khönig ann ettlichen orthen sein kriegsvolckh abmahnen hatt laßen, daz auch solliches weitter nit feintliche hannd anlegen, sondern auf andern bevelch warten solle.
Hierzwischen aber hatt der moscovitter 20.000 tartaren und ob 25 moscovitter ausgesant, die haben mehr gemeltem khönig mit prannd unnd plündern ann mehr orthen großen schaden gethon, sonderlich die statt Molegau, gegen Orsau und Slova ligende, geplündert und volgents inn prandt gesteckht.
Als nun der khönig solliches vernommen, hatt er alles sein kriegsvolckh zue hauff gefordert und mit großem zorn eillents vonn der Dhisnau auf Polotzgau unnd Pleskau fort geruckht, der solle sich zwischen Moscau und Neugarten lägern, daselbsten mehrers kriegsvolckh erwarten wellen, die ime dann vonn mehr orthen vil volckh unnd mit hauffen zuezieche, als dann forhabens, den moscovitter mit allem ernst haimzuesuechen und mit denselben khaine friden nit mehr einzuegehn, ja auch nit auf waserlay fürschläg und conditiones, die ime mechten angebotten werden, sondern den moscovitter mit dem schwert zuebezwingen, die weill doch weder trauen noch glauben bey ime, sondern alles sein thuen nur auf falsch und betrug gericht ist.
   2] Sonst ist von hinnen für diß mal nichts anzuezaigen. Die Khay(serliche) Ma(jestä)t etc. laßen sich noch bisweilen inn ainem seßell inn garten tragen, khönden zue fues noch ibel fort khommen.
   3] Die kayserin, khönigin vonn Franckhreich, princeßin und ertzherzog Ernst etc. seindt auf 10. dis zue Wien einkhommen, haben sich mit der jacht, baizen und dergleichen belustigungen und kurtzweilen etwas underweegs uffgehalten, unnd soll die höchst gedachte kayserin innerhalb 6 tagen ungefahrlich nach irer zue Wien ankhunfft vonn dannen widerumb zueverruckhen willens gewest sein und iren weg durch der F(ürs)t(lichen) Durch(lauch)t ertzherzog Carols lanndt unnd forter auf Italiam ir rais ann die hanndt nemmen.