Cod. 8954 - 25r-25v

Aus Wien von 27. January
   1] Den 21. diß ist der beeg vonn Segeth mit den benachbarten türggen mehr dann inn die 1500 starckh über den Platten See (der damalls hart zuegefroren) gefallen, under dem castell Khemens 4 dörffer abgebrannt und mehr dann 300 personen wegckh gefierth.
Die von Papa, als sye der feindt heraußen (durch die khreiden schüß so umb 10 uhren inn der nacht beschechen) gewahr worden, haben sich uffgemacht, zue den andern gränitzern uff dem weeg gestoßen, und also inn allem nit mehr alls 500 starckh auf castell, so hart am Platten See ligt und dardurch die türggen ire straß zuenemmen vermaint, zuegezogen.
Des anderen tags gegen den abent seind die türggen haimbwarts und bey castell fürgezogen, die unseren haben uff sy gesetzt, sy zertrent, den raub mit sampt den gefangnen christen abgejagt und mehr dann 200 darnider gesäblet, vil gefangen, deren anzahll man noch nit waißt, zwen fhanen und ain hoer trummell bekhommen.
   2] Das religion wesen inn Steyr zue Grätz, wie bericht wirdet, miltert sich zimlich, unnd ist dem nunctio, der es angespunnen, zimlich pang, weill er sichet, daz es den weeg nit erraicht, als er verhofft, seind auch aus dem gegenthaill vil, die da wollten, man hette es nit angefangen, steth alleß inn der hanndt Gottes, ist es vonn menschen, so wirdets selbs fallen.