Cod. 8954 - 281r-281v

Aus Wien vom 5ten October anno 1581
   1] Die türggen an den crabatischen gränitzen von 4 biß inn die funf tausend starckh zu roß unnd fueß sein mit etwas feldtgeschütz vor wenig tagen an das wasser, Kulp genant, khommen, darauß auch eines theylß sonderlich die ross uber die Kulp gesetzt unnd inn den schönen tractum duriopole  gefallen, das uberig kriegsvolckh aber ist wegen deß angenummenen furth unnd verthädigung deß pass enthalb des wassers bei dem geschütz verbliben, das also durch die herüber gefallnen türggen biß in die hundert christen sterben, sambt einer starckhen anzal viech bey Craberskho aufgehebt unnd hinweg gefüert worden ist.
   2] So haben sich hergegen die unserigen als Endendi, Caspar Alary, Gabriel Tachy unnd Michael Zäggt mit irem volckh zusammen geschlagen, den feinden auf dem fueß nachgezogen, an die selben getroffen, die zertrennt unnd den beeg von Rackowitz sambt dem Aly beeg dermaßen zur flucht getrungen, das sie auch schwerlich davon entrunnen, in disem angriff ist ein türggischer ziausch nidergehaut worden, die unsern aber seind ohne genummnen schaden mit einer starckhen peut, wie wir berichtet, zuruckh gewenndt.
   3] Verschinen sontag den vier und zwaintzigisten verschinen monats ist der türggisch gesandter von hinnen abgeschiden, hat sich der offerierten prasent als ein unverschambter gast bey Ir D(urchlauch)t etc. schrifftlich beschwerdt, unangesehen, das Ir D(urchlauch)t etc. ime alhie inn die funfhundert guldin verehren lassen, mit dem fürgeben, er hette sich vill eines stattlichern versehen unnd müeste sich dessen an der portten schamen, darauf ime Ir D(urchlauch)t etc. außer alles dessen, was er zu Prag bey der Kay(serlichen) M(ajestä)t etc. empfangen, noch inn die hundert daller werh silbergeschir verehren lassen.
   4] Die türggen sollen auch willens sein, bey dem neugebauten castell Damasd ein pruggen uber die Eypel zu pauen, darauf den ganzen pergstetten grosse gefahr, stuende aber, es solle inen verhoffentlich gewert werden.