Cod. 8954 - 292r-292v

Aus Wienn vom 22ten October anno 1581
   1] Auß Crabaten vernemmen wir, das die türggen abermaln inn starckher anzall inn dem tractum duriopole  eingefallen unnd inn die 400 seelen sambt einer starckhen anzal viechs on alle hinderung hinwegkh gefüret haben.
   2] Umb Wihitsch, den eüssersten ortfleckhen inn Crabathen, alda herr Sebastian vonn Lamberg hauptman ist, sein sy gleichfals inn einer starckhen anzal zu roß unnd fueß eingefallen, als sy sich aber inn einer insell daselbs zertrennt, hat der von Lamberg mit seinem kriegsvolckh das fueßvolckh, unwissent der türggen, zu roß angriffen unnd geschlagen, darauß iren dannocht inn die achtzig umbkhummen unnd gefangen worden, die zu roß aber, als sy die niderlag des fueßvolckhs vernummen, haben also iren abzug genummen, unnd beschicht dergleichen mehrers an gemelten gräniz vast täglich.
   3] Auß Poln haben wir gwißheit, das sich der könig von Poln nach eroberung etlicher vorligender schlösser unnd heusser nun umb die stattliche vöstin unnd statt Plescau angenummen, und wie etliche schreiben, so sey dieselbe albereit erobert, diß soll ein solch starckh ort sein, darauf die moscowitter inn gemain inn einem solchen schreckhen, das sy teglich inn grosser anzal zum könig fallen, dermassen, das zubesorgen, es möchte mit dem moscowitter ein seltzamen außgang gewinnen, dann weil sie sich gegen den könig inn allen seinen fürnemmen nie erzeigt, sey wol abzunemmen, es sey die sachen also geschafft, das sy weder ein noch auß wissen, der könig aber lasse die schlechten heüsser immer hinder ime ligen unnd greiffe nur die fürnembsten an, hab an kriegsvolckh unnd proviandt kheinen mangel unnd sey bey ime immer mererer glickhlicher fortgang zu spiren, dem moscowitter soll ein hilff von tartarn zuckhummen sein, ob aber die sein gwißheit wierde haben, wolle schier menigelich daran zweiflen.
   4] Negst verschinen Augusti confirmirn brieff von Constantinopel, das Sinan bassa auß Persia daselbs mit solcher solemniter einbelaittet, das sich zuverwundern, geb meniglich seiner stattlichen verrichtung gegen den persianer vill auß unnd sey doch wenig inn allen sachen mit grossem unhail außgericht, persianer solle ein stattliche pottschafft inn sachen des frids halben hernach schickhen, aber hieran sey nichts, sonder diß werde allein der türggen gebrauch nach zum schreckhen außgehen unnd sey auch zwischen disen feinden nichts minders als eines bestendigen friden zuversehen, er, Sinan, als dem das obriste visirial aufgetragen, sey so üppig, das er der Kay(serlichen) M(ajestä)t etc. present trotzlich außgeschlagen unnd wolle inn summa nur auf Hungern. Dem breche der Allmechtig sein anschlag.
   5] Auf unsern hungerischen gränitzen hören wir sunsten der zeit nichts widerwertigs.