Cod. 8954 - 311r-311v

Auß Wienn vom 20ten Novembris anno 1581
   1] Als sich vor wenig tagen die drey beegen von Zolnockh, Berin unnd Hatwan inn die 3000 starckh versamblt, den marckht zu Morzy zu uberfallen, hat sich der obrist zu Toggay, Carl Rueber wie auch der von Erla auf einkhumne kundtschafft aufgemacht unnd inen mit hilff etlicher anderer gränitzer, dabey auch ein anzal teütscher reütter unnd archibusier gewest, entgegen gezogen, der mainung, wo sie den feindt antreffen würden, die schanntz mit inen anzunemmen, wie sie nun die türggen nit antreffen künden unnd im abzug sich inn ein dorff ubernacht gelegert, haben die feind unversehens auf die unsern gestoßen, also das der unsern inn eyll khein platz gelassen worden, sich zur gegenwöhr zurüsten, hierunder greiffen die türggen die unsern an, halten die teütschen unnd archibusier dannocht den feind etwas auf, 400 hussarn aber, auch denen etlich erstes angriffs gebliben, nemmen die flucht, unnd müessen also die ubrigen auch den abzug, doch one sondern schaden nemmen, es ist noch ungewiß, wievil der unsern allenthalben gebliben, aber der bassa hat selbs geschriben, das ime auß dieser peut 12 hussarn, ein teütscher unnd zwen fahnen verehrt worden, hetten die unsern nit die flucht genummen und weren nit so sicher gewest, hetten sie ohne zweifel den feinden etwas stattlichs aberhalten künden, der marckht aber ist hierdurch unangegriffen bliben.
   2] Deß obristen visier Sinan bassa feindtlichs gemüths gegen der hungerischen gränitzen rüert sich je lennger jhe mehr, da es mit Persia zu einem frid khummen solt, were sich nichts mehrers als eines kriegs, daher dessen er sich auch offentlich vernemmen last, zubesorgen.
   3] Der bassa von Ofen soll ein guet bedunckhen von einnemmung der bergstett an die portten geschickht haben, auch inn pratickhen stehen, wie er hinder dieselben khummen mög, wo solches zum werckh khummen soll, wierdet er einer neuen beraitschafft bedürffen, das wierdet dann so still nit geschehen könden.
   4] Von der polackhen kriegsfortganng gegen dem moscowitter hören wir der zeit fast gar nichts.
   5] Der hungerisch landtag ist nach Martini außgeschrieben, daher seyen wir nunmehr der Kay(serlichen) M(ajestä)t gewißlich gewarttendt.