Cod. 8954 - 324r-324v

Auß Wien vom pr(im)o December
   1] Verschine tag seind die türggen gar auf den öden marckh zuem Dotes inn die schranckhen bey 20 pferdt hinein khommen, zwen seindt abgestigen unnd ain hußaren inn garten griagt, die andern türggen seindt bey St. Georgen inn der hallt gewesen, die waren vonn Ofen, Pest, Schambockh unnd Wähl.
   2] Eben gedachte türggen haben diese tag auf 3 underschidlichen orthen widerumb hallte gestoßen, etliche pferdt sich neben denn holz wegen zue fueß gar inn schwenckhen hinein geschlaifft, allßdann auf die roß gesprungen unnd das viech hinweg treiben wellen, alls inen das kriegsvolckh nachgesezt, seindt die andern auß der hallt auch herfür, unnd die zuem tritten mahl wider inn die vesten griagt, denn türggen seind etliche roß geschossen unnd etliche thodt pliben.
   3] So ist herr Franz Nadaßdi mit seinen unnd deß Buthanani, deß bischoffs vonn Raab, allso auch deß Tschoran unnd denen kriegsleütten vonn Papa, darzue sich auch die vonn Raab, Comoren, Totes, Wywar geschlagen unnd inn die 2000 starckh waren, uff Weißenburg gezogen, alda vermaint, die türggen aus ain hallt heraus zuebringen, das ist inen aber nit gerathen, dann sie verkhundtschafft worden unnd sich khain ainiger türgg heraus begeben, seind allso die unsern ungeschaffter sachen wider haimb khommen, aber khurzlich zuvor ist der Nadaßdi mit etlichen vonn clain Camär unnd denselben castellen unnd mit seinen leüthen inn 700 starckh bey Lückh unnd Zapaß auf die wallachische pauren gezogen, das glückh troffen, das die fürnembste türggen damalls gleich zuem Sigeth waren, allda er bey 700 haupt viech unnd ettliche walachische personen weeg gefüert unnd ohne schaden gehn Schomar bracht.
   4] Umb dieselb zeit haben die vonn Westpam auch etlich volckh zue roß außgeschickht, welliche ain aga uff der straße angriffen, vonn desselben mit reittenden ain […]  pascha selbs 4 weg gebracht unnd ain gefangnen christen erledigt, wellichen die türggen zue der schazung gefiert.