Cod. 8955 - 429r-429v

Aus Constantinopl  vom 7. July anno 82, gein Wienn presentiert den 20isten September
   1] Persia stehen noch in deren terminis, inmassen ich jungst Eur F(ü)r(stlichen) D(u)r(chlaucht) gehorsamist zuegeschriben, nemblichen das der krieg dorthin noch ferner continuieren unnd Sinan bassa nach den festenn also auch andere haubter mehr mit starckher macht widerumb forttziehenn sollen, die persianisch pottschafft, dero man (wie ich bei nechster ordinary geschribenn) ainß tags urplützlich die pyn, so ir unnd den irigen auf den sin podrono zu insehung der festenn unnd solenniteten aufgericht worden, wider abgerissen, ist noch alhie unnd sonnst gleichwoll gegen ir anderst nichts furgenohmen worden, sy enthellt sich in irer behaußung, khumbt nindert anderstwo wie zuvorhin, villeicht daz man sy fur ir personn nichte außgehen lest.
   2] Man will hie in der gemain sagenn, das die pollnischen kösackhen unnd einßthailß undter dem khönig von Poln wesenden raissen nemblich biß in die 20.000 tartarn geschlagenn unnd erlegt, volgendts auch ain vesten ort nit wait von palude Meodit belegert habenn sollen, da nun dem also mag sy leichtlich ein großes feuer hierauß anzinden, unnd der khonig auß Polen die jenigen sonderlich Sinan bassa, der ime dem khonig ohne daz gar ubel gewöllt, sowoll alß die tartarn, die sich zurechenn gedenckhen werden, wider ime auf bringenn unnd ime noch mehrers auf den halß laden.
   3] So hört man, das die morn in Barbaria wider auf rurisch sein unnd biß in die 700 turckhen derselben enden erschlagen haben sollen, derwegenn dann dem Assan bassa, der widerumb victe zu Algur worden, soll bevolhen werdenn, auf daz ehist mit ainer anzahl gallern nach Barbaria zu schieffen, damit solcher tumult gestillt unnd ferer aufrur verhuett werdenn.
   4] Man sagt sultanus sei willens gewest, nach volenden fessten oder zu beschluß derselben ain solennem introitum in und durch die statt biß in sein seruglio zuhalltenn, weil aber die ganitschern ir zu solchen sulthanischen beschneidungs festen von allters gewonlichen verehrung starckh begern unnd hefftig darauf trungen, hat er solchen einritt wider eingestellt, besorgent, es möchte ime etwo wie seinem vatter, alß er inß regiment unnd hieher khommen, ein possen widerfahren, unnd ime gleichsfahlß der weeg vonn den ganitschern, biß er sie ihres gefallenß contentiert, verstanden werden.