Cod. 8955 - 456r-456v

Aus Wienn vom 30. Octobris anno 82
   1] Alß jungstlich der Fencola weida in der Moldau herauß auf der Khay(serlichen) May(estä)t dition ziehenn wöllen, aber auf bestellten khundtschafften von dem könig in Poln angenohmmen unnd zue reusischen Lemberg aufgehallten worden, hatt ine gedachter könig auf den 26ten verschines September den kopff abgeschlagen unnd also sein guett, welches in die 600.000 ducatten werth gewest, confisciern, doch sein weib, khindt unnd kriegsvolckh abziehenn lassenn, worumb er so geschwindt wider ine procediern, dessen hat er auf obbemellten tag ein offen schreiben in polnischer sprach an daz rathhauß anzuschlagenn bevolchenn, alß nemblich er weida hab inn seine leut niderwerffen, dieselben mit prigeln schlagenn lassen, inen ire brieff geöffnet unnd die dem khönig mit gespött wider zuegeschickht, item er habe ine könig an den portten gegen dem sulthan verunglimpfft, also das er der zeitt noch dortten in verdacht stehen muesse, habe die tartarn wider Poln aufgebracht, also das die in die polnische dition eingefallen unnd merckhlichen schaden darinnen gethonn habe, er weida hab sich mit ime in khaine conpactaten nit einlassenn wöllenn, sonnder sei mit feindtlichen angriff selbst in die polnische dition eingefallenn, vil dörffer verhördt unnd dergleichen muettwillen mehr geuebt unnd waß der ursachen mehr sein mugen, man will nit zweiveln, die turggen werden solches ungeantes nit lassen, aber es ist wol zuerachten, er werde  vonn dem confiscierten guett nit vil gedanckhen wider zugebenn, welches alles die consequenz mit sich bringen wirdt.
   2] Die Khay(serliche) May(estä)t haben abermahlß  bewilligt, dem bassa ain gesandten, so brieff vom turggischen khayser selbs bringen soll, herauf zu passiern, der wirdet inner funff oder sechß tagenn alhie sein, unnd soll sein verrichtung unnd werbung hinach geschickht werden.
   3] Sunst ist es auf der hungerischen grenitzen gar still, außer der geringen anzahligen tschetta raisenn, die teglich beidestheilß furlauffen.
   4] Mit grave Bernhardt von Hardegg steedt man in handlung, ime gehn Wywar zum obristen zubestellung, gleichwoll ist noch allerdings mit ime geschlossen.