Cod. 8956 - 18r-18v

Aus Wien von 14. January anno 83
   1] Diese tag sein zeittung von Constantinopel komen auch andern orten auß Hungern, das der persianer dem türcken abermal in die 20.000 man erlegt hab, jetz soll der türckh mit dem tartter beschlosen haben, ime persianer auf eingehenden frueling mit aller macht anzugreiffen, auß Hungern, sonderlich von Ofen, hat man alberait etlich vil tausent centner pulffer uff der Thonau hinab gefiert, so soll ain grosse anzal ispahia und ander kriegsvolckh (wiewol sich der bassa hart darwider setzt) auch fortziehen, wie dann der beeg zue Weißenburg und Passega auch auffgemant, seie also das sich daher widerumb wenig fridens zuversehen.
   2] Der Sinan ist von seinem ambt verstoßen und ime all sein guet, das ain ansehenlicher schatz gewest sein soll, genomen worden, also das, wie man schreibt, in ainem hemat davon ziehen müessen, dis unglückh ist ime daher zugestanden, das er der persianischen pottschafft zue Constantinopel hat vergeben lassen.
   3] Es erzaigen sich die sterbende leut allenhalben in der Türckhey so gefarlich, das dem türckhen beschwerlich genueg fallen wirdt, mit ainem grossen volckh derzeit auffzukomen, man schreibt, das etlicher orten des tags sovil leut dahin fallen, das man schier mit wägen nit solle gevolgen kinden.
   4] Auß Hungern schreibt man, das die von Lala von den türcken seyen geschlagen worden, was aber noch allenthalben daran seye, dessen haben wir noch kain particularitet empfangen.