Cod. 8956 - 241r-241v

Aus Wien vonn 15. October
   1] Vor zwayen tagen haben wir beese zeitung vonn Camorra gehabt, das namlich demnach der obriste alda herr Andre Kielman sein kriegsvolckh gemustert, haben sich ain anzall der türggen auf etlichen schüffen heraufgethon, wie nun der obgedachte obriste deßen khuntschafft gehapt, habe er sein gemusterts kriegsvolckh unverzogenlich imbarchiert unnd den türggen zugeeilt, die haben  gleich im anfang aines der unsern schüffen zuegrundt geschoßen, als aber die unsern fort getruckht, unwißent, daz die türggen zue lanndt ain starckhen hinderhalt gehapt, seindt die unsern mit schaden widerumb gewichen unnd der herr Kyelman obriste geschoßen worden, yedoch (wie man hoffen will) ohne gefahr seines lebens, unnd hat man (eill halben) noch khain entlichen beschaidt geben khönden, wievill der unsern thodt gepliben seyen, aber woll zue besorgen, der schaden werde laider nur zue groß sein, dieweill der herr obriste auch geschoßen worden.
   2] Der rueff geht, die Kay(serliche) Ma(jestä)t etc. werde baldt widerumb hieher khommen, dieweill die contagion der peste nit allain inn, sondern auch außerhalb Prag sehr überhanndt nimpt der gestallt, daz Ir Kay(serliche) Ma(jestä)t etc. khaine sichere niderlag ihres hoffs lägers fürzunemmen wißen, wiewoll die gedachte contagion allhie auch zunimbt, unnd sterben an der peste täglich biß inn 24 personen, deßwegen dann allberaith (neben andern mittlen) auch die gemaine unnd offne badtstuben verbotten unnd zuzuschließen bevolchen werde.
   3] Den neuen bäpstischen calender anlangende, würdet derselb allhie fast vonn niemandts ja allerdings durchaus nit gehalten, unnd sollichen zue halten, haben auch Ir Kay(serliche) Ma(jestä)t niemandts nichts mandiert, allain inn Irer Ma(jestä)t resolution unnd begern vermeldet, das man denselben halten soll unnd wer solliches thue, der erzaig Irer Kay(serlichen) Ma(jestä)t daran ein gefallen auf deß bapsts fürbringen unnd begern.