Cod. 8956 - 9r-10r

1] Itzo khombt schreibenn vonn Constantinopel vom 24. novembris, darinnen besteet wirdt, das den 13. desselben monats ain capitsi von Artzrum per posta daselbs ankhom men unnd zeittung bracht, nachdem der begler beg von Artzrum alß general obrister daselbs sambt ettlichen andern begler begen biß in 30.000 versambleten deß vorhabens, Tifflis zuentsetzen, dabei auch Mustuffa bassa, ain georgianer, so vor vier jaren sich zum turckhenn machen lassen, mit einem grossen volckh gewesen, am hinzug habenn sie khundtschafft bekhommen, das der tockhmarkhische sulthan , deß persianers vetter (der auch dem Osman Bassa im 78. jar in sein leger gefallen und geschlagen hat) mit 10m mann auf der eine seitten, auf der andern die 2 georgianer mit einem starckhen volckh auf sy warttent unnd sy umbringen wöllen, demnach haben sie die turckhen in zwen hauffen gethaillt, welches gleichwol der Mustuffa georgianer starckh widerrathenn unnd den obristen vermant, das volckh beyeinander zebehallten, in dem khommen dem obristen zwen capitsi unnd sultano mit bevelch, er soll dem Mustuffa georgianer mit guetter gelegenhait alßbaldt hinrichten lassen, dann er das volckh sonnst verfuehren unnd verrathenn wurde, der obrist ruefft den fur sich, der Mustuffa erscheint, doch mit seinen leuthen wol versehenn, wie er auß deß obristen redenn unnd anzaigung vermerckht, was es werden wollt, khombt er vor und ersticht den obristen mit einem tolchen, verwundt noch zwen beegler beg, so darbei gewest, deß obristen hofmaister haut er nider unnd salviert sich also auß der zellt zu seinen leuthen, welche darauf einen starckhen scharmutzel mit deß obristen leuthen gehalltenn, daruber auch ettlich hundert umbkhommen, der Mustuffa begibt sich strackhs zu dem andern hauffen, der persianer unnd georgianer haben den turckhischen hauffen deß obristen, so bei 20.000 starckh (dann sie die turckhen, wie oben gemeldt, zerthailt gehabt), angriffen unnd geschlagenn, das von  denselben uber 700 nit darvon khommen, drei saniackh begenn seindt todt bliben, der begler beg von Caramidt hardt verwundt, das gellt, so zur zahlung alle proviant und munition, so zur entsetzung Tifflis dargefurt, dabei 14 stuckh auf redern erobert, darauf sich auch Tifflis an die persianer ergeben.
   2] Der obbemeldt capitsi confirmiert auch, das die persianer sich Cervan khaines weegs begebenn wöllen unnd das deß persiers son mit ettlich tausent starckh in dieselb provintz gezogenn, die wider den feindt zu defendieren, der sulthan unnd alle vetzier sein ob dieser zeittung vest erschrockhen, habenn den capitsi gefenckhlich lassen einlegen, darumb, des er solche zeittung so frue außgebrait, der sulthan hat alßbaldt zwen ansehentlich turckhenn zu erkhundigung der wahrhait hinein auf Artrum geschickht, bei der nacht die vetzier zu sich gefordert unnd rath gehallten, baldt darauf den krieg wider persia zwaymahl lassen außrueffen, das sich menigilich, der vom sulthan besoldung hat, auf nechst khommenden frueling mit dem sulthan selbst oder doch seinen obristen vetzier vort zu ziehenn geruest machen soll, man vermaint gleichwol, sulthan werde selbst nit vorth, sonnder dem Sinan bassa mit ettlichen mehr ansehentlichen vetzieren unnd officieren schickhen. Unnd weill die persianer zu khainer haubtschlacht zebringen, mit erbauung ettlicher vessten sich jetzweder deß landts mehr zumechtigen, biß sy ime persianer muedt machen, die bessten pass im lant einnehmen, sich dann vor ime nit zebesorgenn habenn.
   3] Auß Constantinopel wirdt weitter bericht, das entzwischen der fridts tractation mit dem persianer dem turckhen erlegt sein worden 20.000 seiner besten unnd furnembsten turckhen, so er auf derselben frontier  gegen den persianer gehabt, demnach aber dieselb fridts tractation und vergleichung ettlicher grenitz halben der turckhisch khayser seinem obristen visier bassa, Sinan genant, auf getragen, solle derselb bassa deß turckhischen khaysers  bevelch verzogen und verhinlesst haben, also das unndterdessen dieser schaden ervolgt, derwegen der turckhisch khayser denselben Sinan Bassa seiner digniter entsetzt, alle sein haab und guett zu sich genohmmen, welches ein grosse summa anlautten soll, unndter anderm in desselben bassa schatz funffzehn zentner berlen gefundten worden.
   4] Es wurdt auch geschriben, der turckhisch khayser sei entlich entschschlossen, aigner person wider den persianer zu ziehen, ettliche aber, so frischer brieff, sagenn den turckhischen khayser todt.
Datum Wien den 12. Januarii anno 83