Cod. 8957 - 239v-240r

1] Auß Constant(inopel) von 4. Augusti khombt sovil bericht, daz der obrist vezier Siaus bassa dermassen beim sultoni wegen hievor angezogner ursachen, sonnderlich aber weill man in gwisser erfahrung khomen, daz er mit dem entleibten tartar han gehaime corespondentz gehabt, und nach vermigen des Ossman bassa in derselben impresa bey dem sulton zustirzen oder gar umbs leben zubringen sich bemieth, daz sultan gennzlich entschlossen gewest, ime in offentlichen divan strangulieren oder niderhauen zulassen, hierinen er aber nur der sultanin, seiner schwester, allain verschonet, und von irentwegen, weil si grosses leibs und teglichen niderkhomen soll, ine, Siaus bassa, so berait aus der statt gewest, zue ir der sultanin geen Scutari in ain gartten und daselbst biß auf weitern beschaidt zubleiben bewilligt, und seind ir vill noch der maynung, sultanus werde nach irer niderkhunfft ine Siaus bassa sindiciern und nach verdienst straffen lassen, wiewol andere daneben exempto des Rustan bassa bei zeiten des sultan Salimanin halten wöllen, er Siaus bassa werde durch fürbitt seiner und der andern sultanin noch zu gnaden an und aufgenomen, auch zu voriger dignitet und ambt wider restituiert werden.
   2] Ann Ossman bassa vermaint menigelich, werde sultan ain solchen gerechten und zu solchem ambt teüglichen man haben, der außer sondern unglückhs biß zue seinem todt dabei verbleiben soll.
   3] Der Kay(serlichen) M(ajestä)t orator ist den 5. Augusti bey im gewest und im neben presendierung ainer statlichen verehrung zue seinem ambt glückh gewünscht unnd ime Irer Ma(jestä)t etc. wesen aldorten commendiert, der hat sich dermaßen höflich, freundlich und beschaidenlich gegen ime orator erzaigt, darob er ainen grossen throst geschöpfft und von Ir M(ajestä)t wegen sich hochlich erfreit, das ain solcher mann so seiner erkhlerung nach, die er auch mit ainem aydt zue offermalen bechrefftigt, anderst nichts alß die billichait vor augen und der annderst nichts siecht, alß menigelich guets zuethuen und ainen jeden bei seiner gerechtigkghait zuerhalten zu solcher dignitet khomen, und wavehr er sich in werckh und mit der that seinem erbietten nach gegen der Kay(serlichen) M(ajestä)t und derselben sachen erzaigen würdet, ist zuhoffen, er werde nit weniger alß Siaus bassa selbst die sachen bei dem aufgerichten friden beruehen lassen und nach vermegen darbei erhalten.
   4] Was man zuvor von der erledigung der persianischen potschaften fir gewiß gesagt, daz erlischt nunmehr allgemach und wird hievor weder vil noch wenig mer gemelt, wiewol von menigelichen für gewiß gehalten, er, Ossman bassa, bemüehe sich immer forth, denselben krüeg zu endten, mit erbietung selbst versohnlich nochmals an die gräniz zu ziechen und dieselben allerdings mit der sultanin nutz und reputation zuvergleichen unnd aufzurichten.
   5] Den lezten July sein in die 12 persyohnen gemainer schlechter leüth und scheherezal geen Constant(inopel) khomen, die geben für, daz ir herr, schahknoli  genannt, so zwischen Scheherezal und Balstra praefect ainer provinz gewest, mit allen seinen leüthen von den persianern ab und zue den türggen gefallen sye, begert gemelte provinz under des sultani fahnen und schuz ine und seinen nachkomen vergandt zuewerden, welches sultanus nicht unbillich ganz gern verwilligt, gemelte persianer mit stattlichen klaidern und anderm begnadigt, die auch teglichen widerumb daselbst hin zu irem herrn verraißen sollen.
   6] Den 6. Augusty sein die 2000 schüezen, so mit dem tartarischen küeser nach Domir Capi ziechen sollen, nach empfachung irer gebreichlichen wöhren auß des sultoni zeughauß, nemblich püxen und sebl, gemusstert worden, und haben innerhalb 8 tagen mit dez gedachtem tartar anfangs noch und volgents nach Domir Capi verraisen sollen.
   7] Giaffer bassa und beglerbeg Graciae sollicitirn gleich empsig ir widerraisen auf Constant(inopel), weil aber zausch,  so in Pollen geschickht, nit ankhumen, vil weniger ainiche zeitung von ime gehert wirt, daneben von der Kay(serlichen) M(ajestä)t etc. present khain gewißhait dahin khomen, ist inen von sultano wider auferlegt, auf ain fürsorg daselbst wo si sich befinden noch zu bleiben, und tarf sich leichtlich waß zuetragen, daz si biß auf den winter daselbst verbleiben miessen.
   8] Monsor di Germini französischer agent zu Const(antinopel) hat zu endt Augusti von dannen verraisen und seinen secretarium als ain agenten biß zue ankhonfft ainer andern potschafft daselbst lassen sollen, so ist der venedigische baylus auch teglichen seines successoris damalß gewerttig gewest.
   9] Der Kay(serlichen) M(ajestä)t orator Paul von Eyzing ist umb dieselb zeit zu endt July selbst heftig erkhranckht, und haben die medici dieselb sein khranckhait für anderst nit den für die daselbst regierende infection erkhennen wellen.
   10] Andern in annderhalben monaten biß in 60 menschen biß auf dato derselben schreiben, daz ist biß auf den 7. Augusti, sollen gestorben sein, der orator ist aber damals
alberait außer gefahr gewest.
Wien, den 16. September anno 84.